Ռուսաստանի նախագահ Վլադիմիր Պուտինը Պետդումա է ներկայացրել Ռազմավարական հարձակողական սպառազինությունների կրճատման մասին պայմանագրին (ՌՀԶԿ) Ռուսաստանի մասնակցությունը դադարեցնելու մասին օրենքը: Այս մասին փետրվարի 21-ին լրագրողներին հայտնել է Պետդումայի նախագահ Վյաչեսլավ Վոլոդինը։
«ՌԴ նախագահը Պետդումա է ներկայացրել «Ռուսաստանի Դաշնության կողմից Ռուսաստանի Դաշնության և Ամերիկայի Միացյալ Նահանգների միջև Ռազմավարական հարձակողական սպառազինությունների հետագա կրճատման և սահմանափակման միջոցառումների մասին պայմանագրի գործողությունը կասեցնելու մասին» դաշնային օրենքի նախագիծը», – ասել է նա:
Պետդումայի խոսնակը նաև հայտնել է, որ այս օրենքի նախագիծը կքննարկվի չորեքշաբթի օրը՝ փետրվարի 22-ին, լիագումար նիստում: Դրա վերաբերյալ անհապաղ որոշում կկայացվի, և դրանից անմիջապես հետո նախագիծը կուղարկվի Դաշնության խորհրդին։
