Թումո ակադեմիան արդեն իրականություն է

Այսօր Թումո Երևանում հայտարարվեց Թումոյի նոր նախագծի` Թումո ակադեմիայի գործարկման մասին: Թումոյի գործադիր տնօրեն Մարի Լու Փափազյանը և Թումո ակադեմիայի ղեկավար Նարինե Դավթյանը հյուրերին ներկայացրին ակադեմիայի ստեղծման գաղափարը և փուլերը:

Ծրագրի նպատակն է Հայաստանում և Արցախում Թումոյի կրթական ցանցի ընդլայնմանը զուգահեռ կառուցել դասընթացավարների հզոր մասնագիտական թիմ, որը կապահովի կենտրոնի կրթական ծրագրի բարձր որակը բոլոր համայնքներում:

Թումո ակադեմիան կտրամադրի ուսուցում Թումոյի նորարարական ոլորտներում և ծրագիրը հաջողությամբ ավարտած ուսանողներին կապահովի աշխատանքով Թումոյի մարզային կենտրոններում։ Առանց նախնական մասնագիտական փորձի՝ մասնակիցները կապահովվեն կրթաթոշակով և կստանան ինտենսիվ կրթություն, իսկ բարեհաջող ավարտելով՝ կմիանան Թումոյի թիմին որպես դասընթացավարներ:

Ծրագիրն իր առաջին փուլում կկենտրոնանա Կապան, Կողբ և Դիլիջան համայնքների Թումո կենտրոնների համար դասընթացավարներ պատրաստելու վրա: