Երևանի փոխքաղաքապետ Տիգրանն Ավինյանն անդրադառնալով ֆեյսբուքյան օգտատերից մեկի բարձրաձայնած խնդրին՝ Հրազդանի կիրճում մինչ այսօր շարունակաբար թափվող շինարարական աղբի թեմային, մեկնաբանել է, գրելով․
«Հարգելի՛ Էդգար
– 2023 թվականին նախատեսվում է մաքրել 9000 խմ աղբ ինչպես նաև Կորեայի Ձորի հատվածում և Դավթաշեն կամրջի մոտակայքում կտեղադրվեն աղբաորսիչ հարմարանքներ:
– Նախագծվել է Գետառի վրա ջրերի մաքրման կայան: 2023 թվականին կիրականացվի կայանի կառուցումը:
– Հրազդանի կիրճի էկոլոգիական վիճակի բարելավման նպատակով Հրազդանի կիրճին կտրվի բնապահպանական կարգավիճակ: Արդյունքում կսահամնվեն տարածքի պահպանության տարբեր ռեժիմներ:
– Լրամշակվել են բնապահպանական իրավակարգավորումներ, մասնավորապես Երևան քաղաքի ավագանու համապատասխան որոշումները և դրանց լրամշակումները /36-Ն, 48-Ն, 605-Ն և այլն/, որոնք միտված են բարելավելու Երևան քաղաքում շրջակա միջավայրի վիճակը:
Ինչ վերաբերում է շինաղբին՝ հունվարին դիմել էի Ներքին գործերի նախարարին՝ ապօրինի քարաթափումների իրավիճակը քննարկելու և հնարավոր միջադեպերը կանխելու համար: ՆԳՆ ներկայացուցիչների և Երևանի վարչական շրջանների ղեկավարների համատեղ աշխատանքի արդյունքում մշակվել է գործողությունների պլան՝ հսկողության և բացատրական աշխատանքների միջոցով այս երևույթը մեկընդմիշտ բացառելու համար:
Չենք կարող հանդուրժել տարբեր անհատների և տնտեսվարողների անհեռատես և վտանգավոր վարքը, որից տուժում են մեր հազարավոր քաղաքացիներ: Նման գործունեությունը անհապաղ կասեցվելու է և պատժվելու օրենքի ամբողջ խստությամբ»,- գրել է փոխքաղաքապետը:
