Ակտերն ընդունվելուց հետո կտեղադրվեն կայքում

Կառավարությունն իր այսօրվա՝ մարտի 2-ի նիստում հավանություն տվեց  «Երևան քաղաքում տեղական ինքնակառավարման մասին» օրենքում փոփոխություններ և լրացում կատարելու մասին» օրենքի նախագծին:

Որոշման հիմնավորման մեջ նշվում է. «Երևան քաղաքում տեղական ինքնակառավարման մասին» օրենքի 22-րդ հոդվածի 7-րդ մասի և 49-րդ հոդվածի 2-րդ մասի կարգավորումների համաձայն՝ Երևան քաղաքի ավագանու և Երևանի քաղաքապետի ակտերն ընդունվելուց հետո` մեկշաբաթյա ժամկետում, տեղադրվում են քաղաքապետարանի պաշտոնական համացանցային կայքում:

Երևան քաղաքի տեղական ինքնակառավարման մարմինների կողմից յուրաքանչյուր տարի ընդունվում են ավելի քան 6000 ակտեր: Երևան քաղաքում բնակվող անձանց և Երևան քաղաքի տարածքում գործունեություն իրականացնող բազմաթիվ իրավաբանական անձանց հաճախ անհրաժեշտ է լինում ծանոթանալ նշված ակտերին՝ իրենց գործունեության իրականացման ընթացքում:

Հայաստանում ստեղծված և գործող նորմատիվ իրավական ակտերի հրապարակման միասնական www.arlis.am կայքն արդյունավետ իրականացնում է իրավական ակտերի ինկորպորացված հրապարակումը և նշված կայքում Երևան քաղաքի տեղական ինքնակառավարման մարմինների ընդունած ակտերի տեղադրումն առավել դյուրին կդարձնի որևէ ակտին և դրա բովանդակությանը ծանոթանալու ընթացքը և այդ ակտին համապատասխան գործունեության կազմակերպումը, ուստի իրավական ակտերի միասնական շտեմարան ապահովելու անհրաժեշտությամբ պայմանավորված մշակվել է սույն օրենքի նախագիծը։

Միաժամանակ «Երևան քաղաքում տեղական ինքնակառավարման մասին» օրենքում կատարվում են հղումներ «Իրավական ակտերի մասին» օրենքին, որն ուժը կորցրել է 07.04.2018 թվականին, և ներկայումս նշված հարաբերությունները կարգավորվում են «Նորմատիվ իրավական ակտերի մասին» օրենքով, ուստի «Երևան քաղաքում տեղական ինքնակառավարման մասին» օրենքում «Իրավական ակտերի մասին» բառերն առաջարկվում է փոխարինել «Նորմատիվ իրավական ակտերի մասին» բառերով»: