Թուրքիան կարող է հրաժարվել ամերիկյան F-16 կործանիչների գնումից և դիտարկել այլընտրանքային տարբերակների, այդ թվում՝ ռուսական կործանիչների գնման հնարավորությունը։ Այս մասին ՌԻԱ Նովոստիին ասել է Թուրքիայի նախագահին առընթեր անվտանգության և արտաքին քաղաքականության խորհրդի անդամ Չաղրի Էրհանը։
«Կարծում եմ՝ երկրաշարժերից հետո Թուրքիան կհրաժարվի F-16-երի հայտից, քանի որ դրա արժեքը կազմում է 20 միլիարդ դոլար»,- պարզաբանել է Էրհանը։
Նրա խոսքով՝ Թուրքիայի կառավարությունը սխալվել է՝ Վաշինգտոնից խնդրելով կործանիչներ, որոնք Կոնգրեսը մինչ օրս «ինչ-որ պատրվակով» հրաժարվում է տրամադրել , և որոնք, իր կարծիքով, «հնացած են և անմրցունակ այլ ինքնաթիռների համեմատ»։
«Թուրքիան պետք է անհապաղ փոխի իր որոշումը F-16-ի վերաբերյալ: Օրինակ՝ օրակարգում էր նաև F-35-ի տարբերակը։ Թուրքիան ակնկալիքներ ուներ այդ նախագծից։ Այժմ կան այլ տարբերակներ, օրինակ՝ չինական ինքնաթիռը, որը վաճառվել էր Պակիստանին, ռուսական ինքնաթիռները, ինչպես նաև Eurofighter կործանիչները»,- ասել է Էրհանը։
