Արցախի նախագահ Արայիկ Հարությունյանն այսօր Անվտանգության խորհրդի ընդլայնված նիստին մանրամասներ է ներկայացրել ադրբեջանական կողմի հետ մարտի մեկին կայացած հանդիպումից։ Ըստ նրա՝ քանի որ արցախյան կողմը չի ընդունել ադրբեջանական առաջարկը՝ գնալ ինտեգրացիոն քաղաքականության, փոխանցվել է, որ լինելու են ավելի կոշտ և կտրուկ քայլեր:
Այդ հանդիպմանը արցախյան կողմը գլխավորում էր Անվտանգության խորհրդի քարտուղար Սամվել Շահրամանյանը:
«Երկրորդ հանդիպման ժամանակ Ադրբեջանի ներկայացուցիչը փորձել է քննարկել քաղաքական թեմաներ՝ օգտագործելով ինտեգրացիա բառը, սակայն պարոն Շահրամանյանը կանխել է՝ ասելով, որ եթե պետք է քննարկեն քաղաքական հարցեր, դա պետք է լինի Ադրբեջանի կողմից Արցախի անկախության ճանաչման թեման: Նա հավելել է, որ քաղաքական հարցերի քննարկման համար իրենք լիազորված չեն և տվյալ հանդիպմանը չեն կարող քննարկել այդպիսի հարցեր»,- այսօրվա նիստին ասել է Արայիկ Հարությունյանը:
Արցախի ղեկավարի խոսքով՝ դրանից հետո ադրբեջանական կողմը իր խողովակներով փոխանցել է, որ «կամ ընդունում եք ինտեգրացիոն քաղաքականությունը, կամ առկա խնդիրներին որևէ լուծում չի լինելու, հակառակը՝ լինելու են ավելի կոշտ և կտրուկ քայլեր»:
«Մենք չենք ընդունել, չենք ընդունում և այսօր ուզում եմ նորից հայտարարել՝ այն միայն Անվտանգության խորհրդի որոշում չէ, այլ մեր ժողովրդի գերակշիռ մեծամասնությունն ընդունում է, որ մենք մեր անկախության իրավունքից, ինքնորոշման իրավունքից չենք շեղվելու: Իսկ դա նշանակում է, որ առաջիկայում ունենալու ենք տարբեր զարգացումներ, իրավիճակներ, որոնց պետք է դիմակայենք», – հավելել է նա:
Արայիկ Հարությունյանը նաև ասել է՝ եթե կան այնպիսի տրամադրություններ հանրության մեջ, որ պետք է ընդունել Ադրբեջանի կողմից ներկայացված առաջարկությունը, ապա հնարավորություն ունեն իրենց քաղաքացիական իրավունքների շրջանակում բարձրաձայնել և ասել, որ ընտրած ճանապարհը սխալ է. «Փորձեն ձևավորել այդ տրամադրությունները, երկրում ձևավորեն նոր իշխանություն»:
Անդրադառնալով մարտի 5-ին ադրբեջանական դիվերսիոն գործողության հետևանքով Արցախի ներքին գործերի նախարարության ոստիկանության ծառայողների զոհվելու դեպքին՝ նախագահը նշել է, որ առաջիկայում նման սադրանքները, ցավոք, բացառված չեն:
«Այն, որ մենք երկար ժամանակ պետք է պայքարենք և այդ պայքարի շրջանակներում լինելու են նման իրավիճակներ, պետք է դա գիտակցենք և կանխարգելիչ քայլեր ձեռնարկենք»,- ասել է Արայիկ Հարությունյանը:
