Վրաստանի իշխող կուսակցության նախագահ Իրակլի Կոբախիձեն հայտարարել է, որ ուկրաինական պատերազմը «Մայդանի հետևանք է»։
«Ի՞նչ կասեք Մայդանի մասին, և ի՞նչ տվեց այն Ուկրաինային: Նրանք կորցրին Ղրիմը և Լուգանսկի ու Դոնեցկի մեծ մասը, այս ամենի շարունակությունն այն պատերազմն է, որն այսօր ընթանում է Ուկրաինայում», – ասել է Կոբախիձեն։
«Վրացական երազանք»-ի ղեկավարն այսկերպ արձագանքել է Եվրախորհրդարանի պատգամավոր Վիոլա ֆոն Կրամոնի խոսքերին․ եվրոպացի քաղաքական գործիչը Թվիթերում գրել է, թե Թբիլիսիի երեկվա իրադարձություններն իրեն հիշեցնում են ուկրաինական Մայդանը:
«Ինչ վերաբերում է Մայդանի հետ համեմատություններին․ նախ ասեմ, որ վրացական Յանուկովիչը բանտում է, և նրա անունն է՝ Միխեիլ Սաակաշվիլի։ Մենք կգործենք ոչ թե ռադիկալների օրակարգով, Վիոլա ֆոն Կրամոնի օրակարգով, այլ վրացական հանրության շահերին համապատասխան», – հայտարարել է Կոբախիձեն՝ հերթական անգամ հերքելով պնդումները, թե «օտարերկրյա գործակալների» մասին աղմկահարույց օրենքի ընդունումը բացասաբար կանդրադառնա Եվրամիության երկրի անդամակցության գործընթացի վրա։
