Հայաստանն ինքնիշխան երկիր է, բայց նման դրվագներ չպետք է լինեն․ Պեսկով

Մեր հարաբերությունների գործընկերային եւ դաշնակցային բնույթը պետք է լինի այն բանի գրավականը, որ նման տխուր դրվագներ չպետք է տեղի ունենան։ Այս մասին հայտարարել է ՌԴ նախագահի խոսնակ Դմիտրի Պեսկովը՝ կապված Հայաստանի իշխանությունների կողմից «Նյուզ մեդիա» հոլդինգի հիմնադիր Արամ Գաբրիելյանովի՝ երկիր մուտքը արգելելու հետ։

«Հայաստանն ինքնիշխան երկիր է։ Միեւնույն ժամանակ, մեր հարաբերությունների գործընկերային եւ դաշնակցային բնույթը պետք է լինի այն բանի գրավականը, որ նման տխուր դրվագներ չպետք է տեղի ունենան»,- նշվում է Պեսկովի մեկնաբանության մեջ։

Հիշեցնենք, որ օրեր առաջ ռուսաստանցի լրագրող եւ հրատարակիչ, «Նյուզ մեդիա»  հոլդինգի հիմնադիր Արամ Գաբրելյանովին արգելվել էր մուտք գործել Հայաստան, եւ նա հայտնվել էր անցանկալի անձանց ցուցակում։ Ավելի ուշ Գաբրիելյանովը հայտարարել է Հայաստանի կառավարությանը դատի տալու իր մտադրության մասին։ «Ես դատի եմ տալիս Հայաստանի կառավարությանը եւ անպայման կստիպեմ նրանց, որ ինձ թույլ տան Հայաստան մտնել»,-հայտարարել է նա։