Ճապոնիան ուժեղացնում է անվտանգությունը G7 գագաթնաժողովի կապակցությամբ

Ճապոնիայի իշխանությունները ուժեղացրել են անվտանգության միջոցառումները Հերոսիմայում G7-ի գագաթնաժողովի անցկացման վայրերում, որը տեղի կունենա մայիսին։ Այս մասին ՏԱՍՍ-ի փոխանցմամբ՝ երկուշաբթի օրը հայտնել է NHK հեռուստաալիքը։

Միջոցառման անցկացման վայր են ուղարկվել մետրոպոլիայի հատուկ նշանակության ջոկատներ։ Իրավապահ մարմինների աշխատակիցները պարեկություն են իրականացնում Խաղաղության զբոսայգում, որտեղ G7-ի առաջնորդները պետք է այցելեն մայիսին: Ոստիկանությունը կարգուկանոն է պահպանում նաև Հիրոսիմայի Grand Prince հյուրանոցի տարածքում, որտեղ տեղի է ունենալու գագաթնաժողովը։

Գագաթնաժողովի մոտակա օրերին Հիրոսիմա կուղարկվեն ոստիկանական լրացուցիչ ստորաբաժանումներ, որոնց հանձնարարված է ապահովել անվտանգությունը: Այս հարցը առանձնահատուկ ուշադրության է արժանանում՝ հաշվի առնելով 2022 թվականի հուլիսին նախկին վարչապետ Սինձո Աբեի սպանությունը։

Ճապոնիան այս տարի նախագահում է G7-ը, իսկ մայիսին Հիրոսիմայում տեղի կունենա գագաթնաժողով: Այս քաղաքը 1945 թվականի օգոստոսի 6-ին ենթարկվել է ամերիկյան ատոմային ռմբակոծության։