Իրականացվող ուսումնասիրությունները շատ կարևոր էին նոր իրավիճակը հասկանալու և նախապատրաստվելու տեսանկյունից, պետությունը պետք է հասկանա, թե ինչպես կարելի է փոխել կառավարման մոդելը։
Այս մասին մարտի 29-ին «Շրջափակման պատճառով Արցախի տնտեսության կորուստների գնահատման մասին» հաշվետվության քննարկման ժամանակ հայտարարել է «Մենք ենք, մեր սարերը» տարածքային զարգացման գործակալության համահիմնադիր, Արցախի նախկին պետնախարար Ռուբեն Վարդանյանը։
Նա հայտնել է, որ շրջափակման առաջին օրվանից փորձ է արվել ոչ միայն օպերատիվ կերպով արձագանքել խնդիրներին, այլև հարցերին մոտենալ երկարաժամկետ հեռանկարի տեսանկյունից: Նրա խոսքով՝ դրա համար պետք էր հետևողական աշխատանք տանել, ինչը շատ կարևոր էր ոչ միայն Արցախի, այլև ողջ աշխարհի համար:
«Կարևոր էր պատկերացնել, որ խնդիրը ոչ միայն պարենի կամ էներգակիրների պակասն է, այլև հասարակության և պետության ապագայի հետ կապված խորքային ճգնաժամը։ Եթե մենք խոսում ենք ճգնաժամի և խնդիրների մասին, որոնք ազդում են բոլորի վրա, ապա կարևոր է աշխատանքին մոտենալ պրոֆեսիոնալ կերպով»,- նշել է Վարդանյանը։ Նախկին պետնախարարը հավելել է, որ Արցախում և Հայաստանում բովանդակային քննարկումների պակաս կա:
«Առանց թափանցիկության, առանց ճիշտ վերլուծության և ախտորոշման չենք կարող դիմակայել ներկա և ապագա մարտահրավերներին»,- նշել է նա։
