Ֆինանսների նախարարության ներկայացուցիչները հանդիպել են ԵՊՀ ուսանողների հետ

ՀՀ ֆինանսների նախարարության և ԵՊՀ-ի միջև կնքված հուշագրի շրջանակում այսօր տեղի է ունեցել հանդիպում Նախարարության ներկայացուցիչների և ԵՊՀ մաթեմատիկայի և մեխանիկայի, տնտեսագիտության և կառավարման ֆակուլտետների ուսանողների միջև:

Ինչպես տեղեկացրին ՀՀ ֆինանսների նախարարությունից, հանդիպմանը ներկա են եղել ՀՀ ՖՆ գլխավոր քարտուղար Կարեն Սարգսյանը, ՄՌԿ վարչության պետ Ծովինար Բարսեղյանը, մակրոտնտեսական քաղաքականության վարչության պետի պարտականությունները կատարող Գարիկ Պետրոսյանը, արտաքին հատվածի կանխատեսումների և վերլուծությունների բաժնի պետ Արշալույս Հարությունյանը և հարկաբյուջետային և դրամավարկային քաղաքականության կոորդինացման բաժնի գլխավոր մասնագետ Նարեկ Կարապետյանը:

ՖՆ ներկայացուցիչներն ուսանողներին են ներկայացրել Նախարարության նպատակները և հիմնական գործառույթները մակրոտնտեսական քաղաքականության մշակման և իրագործման համատեքստում, մասնավորապես՝ հիմնական ուղղությունները, մակրոտնտեսական վերլուծությունների և կանխատեսումների գործիքակազմը և այլն:

Հանդիպման ընթացքում ԵՊՀ կարիերայի կենտրոնի փոխտնօրեն Կարինե Նազարյանը, կարևորելով ֆինանսների նախարարության հետ այսօրինակ միջոցառումների կազմակերպումը, ընդգծել է, որ պետական գերատեսչությունների հետ գործակցությունը ուսանողների մոտ ձևավորում է պետականամետ մտածողություն, և կոտրվում է կարծրատիպը, թե գերատեսչությունները փակ և լճացող համակարգեր են:

Թիվ 1