ՀՀ կառավարությունը հաստատեց «Գիտական և գիտատեխնիկական գործունեության մասին» և «Բարձրագույն և հետբուհական մասնագիտական կրթության մասին» օրենքներում փոփոխությունների նախագիծը։
Ինչպես հայտնեց ԿԳՄՍ նախարար Ժաննա Անդրեասյանը, նախագծերի ընդունումը հնարավոր կդարձնի ոլորտները կանոնակարգող իրավական ակտերի համապատասխանեցումը բարձրագույն կրթության և գիտության զարգացման արդի վիճակին և միջազգային չափանիշներին, կնպաստի այդ ոլորտների առաջընթացին և դինամիկ զարգացմանը:
Մասնավորապես, ի թիվս այլ փոփոխությունների, առաջարկվում է ձևավորել Բարձրագույն կրթության և գիտության կոմիտե, որին կփոխանցվի Բարձրագույն որակավորման կոմիտեի գործառույթները։ Նաև սահմանվում են գիտական դրամաշնորհների տրամադրման ձևերը։
ՀՀ վարչապետ Նիկոլ Փաշինյանն էլ կարևորեց ֆիզիկական ենթակառուցվածքների ու բովանդակային հատվածի համապատասխանությունը ժամանակակից չափանիշներին. «Արձանագրել ենք հետևյալը, որ ցավոք, չենք նկատել, թե ինչպես է բուհական համակարգն ըստ էության շարունակաբար մեկուսանում հետազոտական բաղադրիչից։ Ցավոք ունենք իրավիճակներ, երբ ՀՀ-ում դիմորդն ընդունվել է բուհ, ավարտել այն, դիպլոմավորվել ու այդպես էլ առարկայական առնչություն չի ունեցել իր մասնագիտության հետ։ Եվ այս իրավիճակները գնալով մեծանում են»։
