Վերջին օրերին Սյունիքի հետ կապված մի կողմից բավական հակասական տեղեկատվություններ կան, մյուս կողմից իշխանությունը փորձում էր իրականությունը խեղաթյուրել։ Փաստացի, ապրիլի 1-ից տեղի է ունենալու Արցախը Հայաստանին կապող ճանապարհի երթուղու փոփոխություն:
Այս մասին այսօր ԱԺ-ում լրագրողների հետ զրույցում նշեց «Պատիվ ունեմ» խմբակցության քարտուղար Տիգրան Աբրահամյանը:
«Եթե 44-օրյա պատերազմից հետո Արցախից մուտքը ՀՀ Տեղ գյուղից էր և այնտեղ 5 կմ-անոց միջանցքային տրամաբանությամբ բուֆերային գոտի էր ձևավորված, որտեղ ադրբեջանական կողմը դիրքեր չուներ, և բնականաբար այնտեղ նաև հայկական կողմը դիրքեր չուներ, ապա Կոռնիձորով ճանապարհի պարագայում Ադրբեջանը ժամկետից 2-3 օր առաջ փաստացի եկել է և մեկնարկային առումով առավելություններ ստանալով դիրքավորվում է»,-ասաց նա:
Անդրադառնալով ադրբեջանական կողմից սահմանագծի հատվածում դեպի Հայաստան 100-300 մետր առաջ գալու հանգամանքին՝ Աբրահամյանն ասաց.
«Ես կարծում եմ, որ Ադրբեջանը ոչ թե խնդիր է դրել 100 կամ 200 մետր մխրճում ապահովել, այլ եկել, դիրքավորվել է այն հատվածներում, որն իր համար բարենպաստ է և ինչը նրան հնարավորություն է տալու ինչպես ընթացիկ մարտական հերթապահության իրականացման, այնպես էլ մարտական այլ խնդիրների իրականացման համար։ Այստեղ ամենամեծ խնդիրներից մեկն այն է, որ ՀՀ իշխանությունները պարզապես հղում կատարելով Ադրբեջանի հետ բանավոր պայմանավորվածություններին, սպասել են մինչև ապրիլի 1-ին, որ կարողանան իրար հետ ձևավորել առաջնագիծը: Սա այն դեպքում, երբ հայտնի է, որ Ադրբեջանը նույնիսկ իր գրավոր պարտավորությունները չի կատարում: Օբյեկտիվ առումով որևէ իշխանություն չէր կարող վստահություն ունենալ, որ Ադրբեջանը բանավոր պայմանավորվածությունը կկատարեր»,- ասաց Աբրահամյանը:
