Ուկրաինայի նախագահ Վլադիմիր Զելենսկու գրասենյակի ղեկավարի խորհրդական Միխայիլ Պոդոլյակը «անհեթեթ» է անվանել Բելառուսի առաջնորդ Ալեքսանդր Լուկաշենկոյի՝ Ուկրաինայում «առանց զորքերը տեղաշարժելու և վերախմբավորելու իրավունքի» ռազմական գործողությունները դադարեցնելու առաջարկը։
Պատասխան հայտարարությունը հրապարակվել է Զելենսկու գրասենյակի թվիթերյան էջում։
«Ցանկացած հրադադար կնշանակի Ռուսաստանի Դաշնության իրավունքը՝ մնալու օկուպացված տարածքներում։ Սա բացարձակապես անընդունելի է։ Ուկրաինան իրավունք ունի զորքեր և տեխնիկա տեղափոխել իր տարածքով այնպես, ինչպես հարմար է գտնում», – ընդգծել է Պոդոլյակը։
Նրա խոսքով՝ նման առաջարկներ անողները «տարօրինակ խաղաղապահներ» են:
Հիշեցնենք, որ ավելի վաղ Բելառուսի նախագահ Ալեքսանդր Լուկաշենկոն, ուղերձով դիմելով ժողովրդին և խորհրդարանին, առաջարկել է դադարեցնել ռազմական գործողություններն Ուկրաինայում և զինադադար հայտարարել։
«Մենք պետք է կանգ առնենք հիմա՝ նախքան էսկալացիայի սկսվելը։ Ես կփորձեմ ռիսկի դիմել՝ առաջարկելով դադարեցնել ռազմական գործողությունները… հայտարարել զինադադար՝ առանց տեղաշարժի, երկու կողմից զորքերի վերախմբավորման, զենքի, զինամթերքի և ռազմական տեխնիկայի փոխանցման իրավունքի»,- ասել է Լուկաշենկոն։
