Թեժ իրավիճակ ԱԺ-ում. պատգամավորները հայտարարեցին ԱԺ ամբիոնից չհեռանալու մասին

ԱԺ նիստում թեժ իրավիճակ է։

ԱԺ Մարդու իրավունքների պաշտպանության և հանրային հարցերի մշտական հանձնաժողովի նախագահ Թագուհի Թովմասյանը ելույթից հետո հայտարարեց, որ, որպես քաղաքական ակցիա և ի նշան բողոքի, չի իջնելու ԱԺ ամբիոնից․ «Թույլ չեմ տալու երկրի թիվ մեկ ամբիոնից կրկին ստեր հնչեցնեք, կասկածի տակ դնեք Արցախի հայկական լինելը կամ հայ ժողովրդի պատմությունն՝ ընդհանրապես»,- ասաց նա՝ պատգամավոր գործընկերներին ևս հրավիրելով ամբիոնի մոտ։

ԱԺ «Պատիվ ունեմ» և «Հայաստան» խմբակցություններից մի քանի պատգամավոր մոտեցան ամբիոնին։

ԱԺ նախագահ Ալեն Սիմոնյանը կոչ արեց ազատել ամբիոնը, որից հետո դահլիճ հրավիրեց անվտանգության աշխատակիցներին և հայտարարեց ընդմիջում։

Անվտանգության աշխատակիցներին հաջողվել է ամբիոնի մոտից հեռացնել ընդդիմադիր պատգամավորներին։ ԱԺ նիստը վերսկսվել է։ 

«Այսպես ասած՝ ակցիա էին իրականացնում, իսկ իրականում խոչընդոտում էին սահմանադրական գործընթացն ԱԺ-ում։ Նրանց հայտարարվում է նկատողություն, ինչպես նաև նրանք զրկվում են այսօր նիստերին մասնակցելու և ելույթ ունենալու իրավունքից»,- ընդմիջումից վերադառնալով ասաց Ալեն Սիմոնյանը՝ հավելելով․ «Այն պատգամավորները, որոնք չեն մասնակցել այս ամենին, բնականաբար, կվերադառնան և կշարունակեն իրականացնել օրենքով նախատեսված իրենց լիազորությունները»։