Շամշադինը նոր կյանք կստանա Թթուջուր-Նավուր ավտոճանապարհի հիմնանորոգման շնորհիվ

Սկսվել են Թթուջուր-Նավուր հանրապետական նշանակության ավտոճանապարհի հիմնանորոգման աշխատանքները․ ծրագրի ընդհանուր արժեքը 8 մլրդ դրամ է, որը հատկացվել է ՀՀ պետբյուջեից:

Ճանապարհի երկարությունը 40 կմ է, որից 25 կմ-ն Տավուշի մարզում է: Աշխատանքները նախատեսված է ավարտել 2024 թ.-ին:

Այն հատվածը, որն այժմ հիմնանորոգվում է՝ վերջին անգամ ասֆալտապատվել է 1984 թվականին, և երթևեկության համար անբարենպաստ լինելու պատճառով տարիներ շարունակ չի շահագործվել որպես Տավուշի մարզի այս հատվածը՝ Շամշադինը, մայրաքաղաքին կապող հիմնական ճանապարհ։

Փոխարենը շրջանի կենսական ճանապարհն անցնում էր Բերդ-Պառավաքար-Իջևան հատվածով, որով Բերդից Երևան կարելի էր հասնել մոտ 4-4,5 ժամվա ընթացքում։

Նոր հատվածի հիմնանորոգման շնորհիվ մայրաքաղաք տանող ճանապարհը կկրճատվի 1,5-2 ժամով։ Սա նոր կյանք կտա Ադրբեջանի հետ սահմանամերձ բնակավայրերին, նոր թափ կհաղորդի բիզնեսին և ներդրումներին, էականորեն կավելացնի տուրիստական ներհոսքերն ու կաշխուժացնի 15-ից ավելի բնակավայրերի կյանքը։

Սա քայլ է, որն էական է ոչ թե հերթական բարեկարգում դիտարկվելու տեսանկյունից, այլ արմատական, կենսական նշանակության հաղորդակցության նոր հնարավորություն է մի ամբողջ շրջանի համար, որն իրավացիորեն համարվում է Հայաստանի հյուսիսարևելյան դարպասը, և որի կենսամակարդակն ու մայրաքաղաքի հետ կապն ուղիղ ազդեցություն է ունենալու շրջանի զարգացման, բնակչության կյանքի որակի բարձրացման և ապագայի հեռանկարների տեսակետից։

Նվարդ Մելիքյան