Վրաստանը պատրաստ է ապահովել բոլոր այն չափանիշները, որոնք անհրաժեշտ են ԵՄ թեկնածուի կարգավիճակ ստանալու համար, սակայն եթե երկրին այդ կարգավիճակ չտրվի, դա «խնդիր չի լինի»: Այս մասին ըստ EurAsia Daily-ի, ասել է Իշխող «Վրացական երազանք՝ ժողովրդավարական Վրաստան» առաջնորդներից մեկը՝ Թբիլիսիի քաղաքապետ Կախի Կալաձեն:
Նրա խոսքով, Վրաստանն այդ կարգավիճակին արժանի էր արդեն անցյալ տարի, իսկ դրանից հրաժարվելը ԵՄ քաղաքական որոշումն էր՝ պայմանավորված այն հանգամանքով, որ երկիրը չմիացավ հակառուսական պատժամիջոցներին և չներքաշվեց պատերազմի մեջ։
«Ես բազմիցս ասել եմ և կրկնում եմ, որ Վրաստանն արժանի էր Եվրամիության թեկնածուի կարգավիճակին։ Ճիշտ է, որոշումը կայացվել է Ուկրաինայի և Մոլդովայի հարցով, բայց մենք առաջինն էինք դրան արժանի։ Մի կարծեք, թե մենք կշտամբում ենք պատերազմող երկրին: Աստված չանի:
Ընդհակառակը, ես միշտ ուրախանալու եմ ուկրաինացիների հաջողություններով։ Սակայն, եթե իրատեսորեն նայեք՝ պարամետրերով ու թվերով, ապա Վրաստանն առաջինն էր, որ կոնկրետ քայլեր կատարեց՝ բարեփոխումներ իրականացնելով, կոռուպցիայի դեմ պայքարով և այլն»,-շեշտել է Թբիլիսիի քաղաքապետը։
