ԱԺ-ում կառավարության հետ հարցուպատասխանի ժամանակ «Հայաստան» խմբակցության պատգամավոր Թադևոս Ավետիսյանը հարց ուղղեց Նիկոլ Փաշինյանին այն մասին, թե ինչ գին է վճարում Հայաստանը տարածաշրջանային ապաշրջափակման համար՝ հաշվի առնելով, որ «Նեմեսիս» հուշարձանի տեղադրումը դարձավ Հայաստանի համար Թուրքիայի կողմից իր օդային սահմանը փակելու պատճառ։
«Առաջարկում եմ այս հարցին ի պատասխան՝ լինենք ոչ թե հարցուպատասխանի ռեժիմում, այլ իրար հետ մտածելու ռեժիմում։ Ես ուզում եմ կրկին վերադառնալ հայրենասիրության մեր մոդելին․ մի կողմից ասում ենք՝ տեղը նեղ է ու չենք կարողանում ապրանքներ արտահանել ու այնպես չէ, որ տարբեր ուղղություններով գնալ-գալով մեզ վրա արձանները չեն ազդում։ Օրինակ մենք առերեսվո՞ւմ ենք նրա հետ, թե ժամանակին Գարեգին Նժդեհի արձանի տեղադրումն ինչ ազդեցություն է ունեցել»,- ասաց Փաշինյանը։
Վերջինս նշեց, որ այսօր Հայաստանը կանգնած է ռազմավարական ընտրության առաջ։
«Այդ ռազմավարական ընտրությունը հնարավոր չէ առանց սոցիալ -հոգեբանական ոլորտում առերեսվելու ու ռեֆլեքսիայի ենթարկվելու։ Ասում եք՝ «Նեմեսիս»-ի արձանն ուշացած էր, իսկ հարց եմ տալիս, եթե ՀՀ-ում նման արձան չլինի, ինչը կտուժեր ու ինչ կշահեինք մենք։ Ինչո՞ւ է այդ արձանը տեղադրվել, մի պարզ պատճառով․ երբ այդ թեման գնացել է սեղանից սեղան, բոլորը մտածել են, որ այդ նախաձեռնությունը եղել է 2020թ-ի դեկտեմբերից 2021թ-ի ապրիլի շրջանում ու բոլորը մտածել են, եթե այս դավաճանության տրամաբանության մեջ, եթե չհամաձայնվեք, մեզ կասեն՝ դուք դավաճան եք։ Մենք բոլորս առաջնորդվում ենք մի տրամաբանությամբ, այնպես անենք, որ մեզ հանկարծ չասեն դավաճան եք, բայց մենք իրականում մեր երկրի պետական ու ազգային շահերը դավաճանում ենք, կարևորը ալիբի ունենաք, որ դավաճանություն չենք արել»,- ասաց Փաշինյանը։
Թադևոս Ավետիսյանի այն դիտարկմանը, որ ՀՀ-ի հարևանը Շվեդիան կամ Ֆինլանդիան չեն, հետևաբար դժվար է լինելու տարածաշրջանում զարգացման օրակարգ զարգացնել՝ զիջելու տրամաբանությամբ, Փաշինյանն ընդգծեց․
«Ի դեպ մեզ առաջարկել են սկանդինավյան երկրների մոդելով լուծել մեր տարածաշրջանային հարցերը, ասել ենք չէ։ Գալով արձանների թեմային հիշեցի, որ մենք արքաների արձաններ չունենք, անգամ փողոցներ չունենք։ Մենք մեր աշակերտներին սովորեցնում ենք, որ հայոց գրերեը ստեղծել են Մեսրոպ Մաշտոցն ու Սահակ Պարթևը, բայց այն, որ Վռամպշապուհ արքան նրանց կանչեց իր մոտ ու պետության անունից խնդիր դրեց, մի քիչ կողք է դրվել, ինչո՞ւ։ Ժամանակին Ամիրյան փողոցը, երբ փորձում էին անվանափոխել Վռամշապուհ արքայի անունով, կենտրոնի բնակիչներն ասացին՝ չհասկացանք, այդ ի՞նչ անուն է, Վռամշապուհը ո՞րն է»։
Փաշինյանի խոսքով՝ առանց տնտեսության զարգացման ոչինչ հնարավոր չէ։
«Երկրները պետական շահ ասելով՝ առաջին հերթին տնտեսական շահը նկատի ունեն։ ՀՀ-ն երբեք կամ հիմնականում չի առաջնորդվել տնտեսական շահով։ Ու, այո՛, մենք էմոցիոնալ ժողովուրդ ենք, բայց ժամանակն է, որ վերածվենք պետական ժողովրդի։ Ես որևէ կասկած չունեմ, որ մենք ազգ ենք ու լինելու ենք, բայց հարց է մենք ժողովուրդ կլինե՞նք , թե չէ, որովհետև ժողովուրդը պետականաստեղծ սուբյեկտ է, ազգը ազգ է,որ գոյություն ունի՝ անկախ ամեն ինչից»,- ասաց Նիկոլ Փաշինյանը։
