Թուրքիայի ներքին գործերի նախարար Սուլեյման Սոյլուն հայտարարել է, որ այսօր երկրում ընթացող համապետական ընտրությունների անվտանգությունն ապահովելու նպատակով ներգրավված է 601 հազար անվտանգության աշխատկից։ Ինչպես տեղեկացնում է թուրքական պետական TRT հեռուստաընկերության լրատվական ծառայությունը, այս մասին Սոյլուն ասել է Ստամբուլում քվեարկությանը մասնակցելուց հետո լրագրողների հետ ունեցած զրույցում։ Թուրք պաշտոնյան ընդգծել է, որ ընտրությունների անվտանգությանն առնչվող միջոցառումները մինչև այժմ իրականացրել են երեք փուլով, որոնցից առաջինը՝ ընտրություններից առաջ, երկրորդը՝ այսօր՝ քվեարկության օրը, երրորդը՝ ընտրություններից հետո։ Նա ուշադրություն է հրավիրել այն բանին, որ 2018 թվականին կայացած ընտրությունների նախընտրական փուլում արձանագրվել է 311 միջադեպ, իսկ այս տարի՝ 280։
Սուլեյման Սոյլուն հայտնել է, որ Թուրքիան ընտրությունների անցկացման մեծ փորձ ունի սկսած 1833 թվականից, ինչպես նաև ըմբռնում՝ ընտրությունների անվտանգության առումով: Նրա խոսքով՝ Թուրքիայի 601 հազար անվտանգության աշխատակիցներ հերթապահում են, և նրանք կապահովեն գործընթացի անվտանգությունը մինչև ընտրությունների ավարտը։ Նա միևնույն ժամանակ ասել է, որ գործընթացի անվտանգության ապահովման նպատակով ներգրավված են 79 ուղղաթիռ և 8 ինքնաթիռ։
Թուրքիայի ներքին գործերի նախարարը հավելել է, որ ընտրությունների անվտանգության համար անհրաժեշտ բոլոր միջոցները ձեռնարկվել են օրեր առաջ։
