ԱԺ «Հայաստան» խմբակցության ղեկավար, ՀՀ պաշտպանության նախկին նախարար Սեյրան Օհանյանը լրագրողների հետ ճեպազրույցում անդրադարձել է սահմանային սրացումներին։ Նրա խոսքով, ՀՀ զինված ուժերի և ԱԱԾ խնդիրն է միշտ մարտունակ վիճակում լինել և միշտ կանխատեսել ու կանխարգելել Ադրբեջանի գործողությունները։
Հակարիի կամրջի ուղղությամբ ադրբեջանցի սահմանապահների առաջխաղացման փորձի մասին, նա նշել է. «Սա հերթական սադրանքն է ադրբեջանցիների կողմից։ Ադրբեջանի զինված ուժերը տարբեր հատվածներում են կազմակերպում միջադեպեր և սադրանքներ՝ իրենց նպատակները առաջ տանելու համար։ Նրանք շարունակում են ճնշումներ գործադրել թե Հայաստանի Հանրապետության, թե Արցախի Հանրապետության վրա։
Ադրբեջանը Հակարայի կամրջում իրականացրած գործողությամբ շարունակում է խորացնել Արցախի շրջափակումը՝ փորձելով Հայաստանի Հանրապետության բոլոր հատվածներում ինքնուրույն սահմանագծում կամ սահմանազատում իրականացնել։ Լավ է, որ հայկական կողմը կարողացել է հետ շպրտել առաջխաղացումը»։
Սեյրան Օհանյանի համոզմամբ, Ադրբեջանը հերթական անգամ ցույց տվեց, որ բանակցություններով որևէ պայմանավորվածության չեն գնալու և շարունակելու են ճնշումները Հայաստանի և Արցախի վրա. «Յուրաքանչյուր երկիր իր անվտանգության ապահովման համար պետք է ձևավորի երաշխիքներ։ Այսինքն՝ ոչ թե խաղաղությունն է երաշխիք, ինչպես այսօրվա Կառավարության ղեկավարն է ասում, այլ երաշխիք են զինված ուժերը և խելացի արտաքին քաղաքականությունն ու դրա շրջանակներում իրականացվող հմուտ բանակցությունները»։
