Ադրբեջանի նախագահի օգնական Հիքմեթ Հաջիևը թուրքական Milliyet-ին տված հարցազրույցում հայտարարել է, որ Բաքուն բարձր է գնահատում «իրական Հայաստանի» հայեցակարգի ընդունումը որպես հիմնարար մոտեցում Հայաստանի ներկայիս վարչակազմի կողմից։
«Մենք ակնկալում ենք, որ սա կներառվի Սահմանադրության մեջ։ Մենք մտադիր չենք միջամտել Հայաստանի ներքին գործերին ընտրություններից հետո։ Նրանք հայտարարություններ են արել նոր սահմանադրության ընդունման մասին։ Երբ այն ընդունվի, խաղաղության համաձայնագրի ստորագրման հետ կապված խնդիրներ չեն լինի։ Մեր նպատակն է ավարտել Ադրբեջանի և Հայաստանի, ինչպես նաև Թուրքիայի և Հայաստանի միջև խաղաղության գործընթացները՝ դրանք զուգահեռաբար իրականցնելով»,- ասել է նա։
Ըստ նրա՝ չկան լուրջ խոչընդոտներ խաղաղության գործընթացի իրականացման համար։
«Մենք հասկանում ենք, որ հայկական կողմը նույնպես ընդունել է նոր աշխարհաքաղաքական իրականությունը և վարում է նոր քաղաքականություն։ Նրանք նույնպես ընդունել են փաստերը և հասկացել, որ օկուպացիան տարիներ շարունակ իրենց փաստացի գերի է պահել. նրանք նաև գիտակցում են, որ դա սխալ էր։ Հայաստանը ճանաչել է Ադրբեջանի և Թուրքիայի հետ հարաբերությունների կարևորությունը իր սեփական զարգացման համար»,- ընդգծել է Հաջիևը։
