«Էս իշխանությունը ձեր երկար տարիների փորձի իշխանությունը չէ». հայտարարել է ԱԺ նախագահ Ալեն Սիմոնյանը՝ դիմելով «Հայաստան» խմբակցության պատգամավոր Արծվիկ Մինասյանին։
«Սա պատասխանատվության, գիտակցման և շատ ծանր իրավիճակում իշխանություն է։ Այնպես չէ, որ իշխանությունում ձեր պատկերացմամբ մեղր է քսված»,- ասել է Սիմոնյանը։
Նա անդրադարձել է ՀՅԴ-ականների հայտարարություններին, թե իրենք 133 տարվա կուսակցություն են. «133 տարի, ի՞նչ 133 տարի։ Թի՞վ ա։ Ո՞ւր է պետականությունը։ Մենք պահում ենք պետականությունը, առանց ձեզ»։
Սիմոնյանը հիշեցրել է վերջին սոցիալական հարցումների արդյունքները, նշելով, որ «Դոգ» մականունով հայտնի Վարդան Ղուկասյանի կուսակցությունն ավելի շատ ձայն ունի, քան ՀՅԴ-ն. «Գնացեք, Դոգի հետ մրցեք, էդ ա ձեր մակարդակը դարձել այսօր»,- ասաց նա՝ հավելելով, որ դա իշխանությանն ամենևին չի ուրախացնում։
Ալեն Սիմոնյանը նաև հարցրեց, թե ինչո՞ւ ընդդիմությունը չի պահանջում արտահերթ ընտրություններ. «Չեք պահանջում, որովհետև 0 ձայն եք հավաքելու»։
Սիմոնյանը, դիմելով տեղից ռեպլիկներ անող ՀՅԴ-ական Գեղամ Մանուկյանին, ասաց՝ «Ռոբերտ Քոչարյանի հետ խոսե՞լ ենք, թե ինչո՞ւ էր Մեղրին տալիս։ Վազգեն Մանուկյանի հետ խոսե՞լ եք, թե Նաիրի Հունանյանի հետ ի՞նչ հարաբերություններ է ունեցել։ Իսկ ո՞վ է ընդունել Նաիրի Հունանյանին ՀՅԴ շարքեր»։
