2023թ․ հունիսի 17-ին Տավուշի մարզի Դիլիջան քաղաքում առաջին անգամ կայացավ «Միմինո» հայ-վրացական մշակութային-խոհարարական փառատոնը:
Հայտնում են ՀՀ Էկոնոմիկայի նախարարության զբոսաշրջության կոմիտեից։
Փառատոնի մասնակից հայ և վրացի թիմերը տաղավարներում պատրաստեցին և ներկայացրեցին իրենց խոհանոցի բազմազան ուտեստները: Փառատոնի մշակութային և երաժշտական գոտիներում ներկայացվեցին ազգային երգ ու պար, արվեստի գործեր, արհեստագործական աշխատանքներ:
Փառատոնի կազմակերպիչը «Հայ խոհարարական ավանդույթների զարգացման և պահպանման ՀԿ»-ն է`ՀՀ Էկոնոմիկայի նախարարության զբոսաշրջության կոմիտեի, Դիլիջանի համայնքապետարանի, Տուրիզմի հայկական ֆեդերացիայի աջակցությամբ:
Փառատոնի բացման արարողությանը հյուրերին ողջունեցին կազմակերպիչներն ու երկու երկրների դիվանագիտական առաքելությունների ղեկավարները` ընդգծելով նման նախաձեռնությունների կարևորությունը մեր երկրների համար:
