Բարձրագույն դատական խորհրդում մեկնարկել է Երևանի ընդհանուր իրավասության քրեական դատարանի դատավոր Դավիթ Հարությունյանի վերաբերյալ կարգապահական վարույթի քննությունը:
Նիստն անցնում է դռնփակ. միջնորդությունը ներկայացրել է արդարադատության նախարարությունը։
Դավիթ Հարությունյանի նկատմամբ կարգապահական վարույթ հարուցելու հիմքը դատավորի տված հարցազրույցն է եղել, որում նա անդրադարձել էր ԲԴԽ նախագահ Կարեն Անդրեասյանի հայտարարությանն ու այն անթույլատրելի համարել:
Լրագրողների հետ ճեպազրույցում դատավոր Դավիթ Հարությունյանը հայտարարեց, թե իր համար պարզ չէ՝ ԲԴԽ-ն ինչ հիմքով է որոշել կարգապահական պատասխանատվության ենթարկել իրեն. «Խոսքի ազատության սահմանափակման վերաբերյալ միջնորդություն է քննարկվում։ Ըստ իրենց՝ ես վիրավորել եմ, բայց մեղադրանքը պարզ չէ։ Իմ բոլոր հորդորները, որ պարզաբանեն ընթացակարգերը, մնացել են օդում․ որևէ պարզաբանում չկա»։
Նա նշեց, որ պատրաստվում է հանցագործության մասին հաղորդում կամ կարգապահական պատասխանատվության ենթարկելու մասին միջնորդություն ներկայացնել ընդդեմ ԲԴԽ նախագահ Կարեն Անդրեասյանի։ Ըստ նրա՝ պատճառը ԲԴԽ դատական նիստում արտահայտած մտքերն են. «Կարգադրիչներին հրահանգեց իմ գույքը դուրս բերել, ասացի՝ իրավունք չունի, ասաց՝ ուժի կիրառմամբ դա կանի»։
Դատավորը նշեց, որ ցանկացել է տեսաձայնագրել ԲԴԽ նիստը. «Բերել էի միկրոֆոն, բարձրախոս, էդ ամենը վերցրին, դուրս հանեցին»։
