«Մենք մեր հարևանների հետ մեր փոխհարաբերությունները կառուցելիս պետք է առաջնորդվենք բացառիկ բարեկամական մթնոլորտ ստեղծելու՝ և՛ պաշտոնական, և՛ ոչ պաշտոնական հարթություններում. դա է մեր առաքելությունը»:
Այս մասին այսօր ԱԺ արտաքին հարաբերությունների մշտական հանձնաժողովի արտահերթ նիստի ժամանակ ասաց «Քաղաքացիական պայմանագիր» խմբակցության պատգամավոր Գուրգեն Արսենյանը:«Մենք խրախուսում ենք, մենք աջակցում ենք ժողովուրդների բարեկամությանը պետական, հասարակական մակարդակներով, հանրային, մշակութային խողովակներով:
Մեր կարևորագույն նվաճումը պետք է լինի մեր հարևան ժողովուրդների հետ մեր հարաբերությունների ճշգրտումը և այդ հարաբերությունը հարևանային ռեժիմ տեղափոխելը: Դա մեր առաքելությունն է, մեր պետության անվտանգությունը, մեր էթնոսի իր տարածքում ապրելու գրավականը»,- նշեց նա հայ-վրացական հարաբերությունների խորացմանն ուղղված համաձայնագրի վավերացման քննարկման ժամանակ:
Պատգամավորը նաև նկատեց՝ մենք այս պահին կանգնած ենք խրթին խնդիրների առջև, որը պարունակում է երկու թնջուկ. «Առաջին թնջուկը հայ-ադրբեջանական հարաբերություններն են, մյուս թնջուկը՝ հայ-թուրքական: Երկու պարագայում էլ այդ թնջուկի առկայությունը գեներացրել է վտանգ Հայաստան պետության և Հայաստանի ժողովրդի անվտանգության համար»:
Գուրգեն Արսենյանի խոսքով՝ Վրաստանի օրինակով պետք է կարողանանք ձգտել մեզ շրջապատող բոլոր երկրների հետ գտնել գոյակցության բանալին, այն ֆորմուլան, որը հնարավորություն է տալիս մեզ խաղաղ ապրել՝ չունենալով իրար ոչնչացնելու ծրագրեր:
«Նորագույն պատմությունը հնարավորություն է տալիս անել հետևություններ՝ ինչն ենք մենք արել ճիշտ, ինչն ենք արել ոչ այնքան ճիշտ, որի արդյունքում մենք ունենք հետևանքներ, որը որ դժվարանում ենք կառավարել, որի արդյունքում ստեղծվել են ռիսկեր, և մենք մեր մեծագույն ջանքերը ուղղում ենք այդ ռիսկերի չեզոքացմանը»,- ասաց իշխող ուժի անդամը:
Վերջինիս խոսքով՝ մեր լավագույն պիլոտային ծրագիրը հայ-վրացական հարաբերությունները պետք է լինեն, որը դառնա այն օրինակը, որին պետք է ձգտենք մնացած էթնոսների հետ հարաբերություններ ձևավորելիս. «Որովհետև ազգամիջյան թշնամանքի հրահրումը, ստեղծումը և տարածումը բոլոր երկրներում բերում է հետադարձ հարվածի, որտեղ որ դու քամի ես ցանում, այնտեղ փոթորիկ ես հնձում»:
