ՀՀ ԱԺ քննիչ հանձնաժողովի նախագահ Անդրանիկ Քոչարյանը լրագրողների հետ զրույցում անդրադարձավ Նիկոլ Փաշինյանի՝ ԱԺ քննիչ հանձնաժողովում ունեցած ելույթին: Խոսելով Շուշիի հետ կապված նրա հայտարարությունների մասին՝ Քոչարյանն ասաց.
«Օնիկ Գասպարյանի հետ մեր հանդիպումը եղել է փակ նիստում, և նրա ասածները որևէ հակասության մեջ չէին պարոն Փաշինյանի ներկայացրած փաստարկների հետ։ Օնիկ Գասպարյանի հետ կապված Քննչական կոմիտեում բազմաթիվ գործերով քննություն է գնում, նաև՝ Շուշիի մասով»:
Հնարավո՞ր է, որ Գասպարյանը նորից հրավիրվի քննիչ հանձնաժողով՝ պատասխանելու հանձնաժողովի անդամների հարցերին, հարցին Քոչարյանն արձագանքեց՝ ոչինչ չի կարող բացառվել․ «Չեմ բացառում, որ երկրորդ, երրորդ անգամ մարդկանց հրավիրելու հարց լինի, և նրանցից նոր պարզաբանումներ ստանանք»։
Հիշեցնենք՝ այսօր՝ հունիսի 20-ին, Նիկոլ Փաշինյանը Քննիչ հանձնաժողովում, ի թիվս այլնի, ներկայացրել էր Շուշիի անկման պատճառները և մանրամասներ հայտնել։ Ըստ նրա՝ Շուշիի անկման մասին լուրը Գասպարյանից ստացել է նոյեմբերի 7-ի կեսօրին։ Իր բոլոր խոսակցություններում վարչապետը հրահանգել է պահել Շուշին և ստացել է հավաստիացում։ Նրա խոսքով՝ 44-օրյա պատերազմի ընթացքում շատ են եղել դեպքեր, երբ որևէ լուրի մասին տեղեկացրել են, ապա ԳՇ-ն հերքել է, սակայն որոշ ժամանակ անց պարզվել է, որ լուրը հավաստի է:
«Շուշիի անկման լուրը լսելով՝ առաջին արձագանքս պահանջն էր՝ կատարեք այն, ինչ խոստացել եք, այսինքն՝ պահեք Շուշին։
Ի վերջո, ինձ զեկուցեցին հակագործողությունների մասին, հետո ասացին, որ օպերացիան հաջող է ընթանում, հետո, որ մենք Շուշիի ներսում էինք, մինչև Եռակողմ հայտարարության ստորագրման պահը ինձ զեկուցում էին, որ Շուշիի մի մասը ՊԲ վերահսկողության տակ է։ Հետո եղավ Եռակողմ հայտարարության ստորագրումը, հետո՝ նոյեմբերի 10-ի հարձակումը Կառավարության շենքի վրա, հետո, երբ վերադարձա աշխատանքի, ինձ ասացին, որ մենք Շուշիում ոչ մի զինվոր չունենք»,- նշել էր նա։
