ԱՄՆ նախագահ Ջո Բայդենի որդին՝ Հանթեր Բայդենը, նախնական համաձայնության է եկել դաշնային հարկերից խուսափելու երկու հոդվածով իրեն մեղավոր ճանաչելու վերաբերյալ։
Հանթերը համաձայնել է իրեն մեղավոր ճանաչել 2017 և 2018թթ․ավելի քան 100.000 դոլար հարկեր չվճարելու մեջ, մինչդեռ այդ ժամանակահատվածում տարեկան վաստակել է ավելի քան 1,5 միլիոն դոլար (1,3 միլիոն եվրո):
Բացի այդ, Բայդեն կրտսերը խոստովանել է, որ ստել է 2018թ․ գնված զենք պահելու դաշնային դիմումի վերաբերյալ՝ չնշելով թմրամոլության փաստը։
Հանթեր Բայդենի և նրա հայրենի Դելավեր նահանգի դատախազի միջև համաձայնությունը դեռևս պետք է հաստատվի դաշնային դատավորի կողմից: Այս դեպքում դատախազները կհամաձայնվեն քրեական հետապնդում չհարուցել նրա նկատմամբ, սակայն նա պետք է որոշակի պայմաններ կատարի, որպեսզի իր վրայից մեղադրանքը հանվի։
ԱՄՆ-ում հետաքննության մարմնի հետ նման գործարք կարող է կիրառվել հոգեակտիվ նյութերի օգտագործման հետ կապված խնդիրների առկայության դեպքում՝ ոչ ծանր իրավախախտումների ժամանակ։
