Հայաստանի առողջապահության նախարար Անահիտ Ավանեսյանն անդրադարձել է ԼՂ-ում ստեղծված հումանիտար վիճակին․ «Բոլոր գերատեսչություններն անում են հնարավորինսը՝ բոլոր խողովակներով աշխատելու, որպեսզի այս իրավիճակը ժամ առաջ հանգուցալուծվի և վերականգնվի մարդկանց, ապրանքների ու դեղամիջոցների բնականոն տեղաշարժը»,- ասել է նա։
Ըստ Ավանեսյանի՝ հումանիտար իրավիճակը ժամ առ ժամ վատթարանում է. «Պաշարներն սպառվում են։ Բացի դրանից, երբ հետաձգվում է պլանային բուժօգնությունը, կարիքները չեն սպասարկվում, դրանք դառնում են անհետաձգելի բժշկական օգնություն»։ Ավանեսյանը վստահեցրել է, որ ԼՂ գործընկերների հետ աշխատում են ամենօրյա ռեժիմով։ Անդրադառնալով միջազգային կառույցներին դիմելուն՝ նախարարը վստահեցրեց, որ ամենշաբաթյա կտրվածքով տեղեկատվություն են փոխանցում։
Ավանեսյանը նաև ասաց, որ Արցախում կան հիվանդներ, որոնց բուժումը հնարավոր է բացառապես Հայաստանում. «Ստեփանակերտի հիվանդանոցը հագեցած է, ունի համապատասխան մասնագիտական թիմ, բայց կան նեղ մասնագիտական ուղղություններ, որ հնարավոր է սպասարկել միայն Երևանում»։ Նա նշեց, որ այդ հիվանդներին չի հաջողվում տեղափոխել անգամ «Կարմիր խաչի» օգնությամբ։
