«Պիտի ասեմ, որ 2018-19թթ․ իմ առաջնային խնդիրն էր՝ հասկանալ բանակցային գործընթացն իր բոլոր մանրամասներով, պրոբլեմներով և հնարավորություններով». ԱԺ քննիչ հանձնաժողովի նիստում հայտարարեց Հայաստանի վարչապետ Նիկոլ Փաշինյանը՝ պատասխանելով հարցին, թե ինչու ժամանակին այս ամենի մասին մանրամասն չի ներկայացրել հանրությանը։
«Հարցը, կարծում եմ, լեգիտիմ է։ Իսկ ինչու 2019 թվականին այս ամենի մասին հրապարակային չի խոսվել այս ձևով, որովհետև հրապարակային ես խոսել եմ։ Նախորդ անգամ ես ներկայացրի 2019թ․ մարտի 12-ի ԼՂ և ՀՀ անվտանգության խորհուրդների համատեղ նիստում ունեցած ելույթս, որտեղ իմ այսօրվա ասելիքի մի մասը հրապարակել եմ։
Բայց, մյուս կողմից, երբ հարց է հնչում՝ ինչու ամբողջական չի ասվել 2019-ին, առաջանում է երկու հարց․ իսկ որո՞նք էին լինելու այդ ասելիքի հետևանքները և արդյունքները։ Հաջորդ հարցը՝ ո՞րն էր լինելու ասելիքը հրապարակելու հաջորդ քայլը։ Եվ այդ պոտենցիալ ասելիքի և անելիքի հետ ինքս ինչքանո՞վ էի ներդաշնակ։ Ուրիշ բան է՝ տեսնել իրողությունը, ուրիշ բան՝ ներդաշնակվել, համաձայնվել այդ իրողության հետ, կամ այդ իրողությունը որդեգրել որպես քաղաքականություն։ Սրանք երկու տարբեր բաներ են»,- ասաց Նիկոլ Փաշինյանը։
Նրա խոսքով՝ հարցը լեգիտիմ է և այն ինքն էլ է իրեն շատ հաճախ տալիս։ Ըստ վարչապետի՝ իր մտածումներն այս երկու եզրի մեջ են. «Այդ ասելիքն ասելու հետևանքը լինելու էր պատերա՞զմ, թե՞ խաղաղությու՞ն։ Այդ ասելիքը, ըստ էության, ընթացող կամ գոյություն ունեցող բանակցային գործընթացը հրապարակային բացելն է։ Դրա ներքին, տարածաշրջանային, միջազգային հետևանքները»։
Վարչապետն ասաց, թե այսօր էլ այդ իրողության հետ ներդաշնակ չէ, բայց ժամանակի ընթացքում եկել է այն եզրակացության, որ այդ ամենի մասին պետք է բարձրաձայնվի քննիչ հանձնաժողովում։
