Եվրախորհրդարանի անվտանգության և պաշտպանության ենթահանձնաժողովի նախագահ Նատալի Լուազոն «Թվիթեր»-ի իր միկրոբլոգում պատասխանել է Բելգիայում և Լյուքսեմբուրգում Ադրբեջանի դեսպան, Եվրամիությունում Ադրբեջանի առաքելության ղեկավար Վագիֆ Սադիկովի սպառնալիքներին։
Սադիկովն իր էջում հրապարակել էր դիպուկահար հրացանի լուսանկար՝ գրելով.
«Նրանք գիտեն, թե ինչ անել իրենց պաշտպանելու համար։ Ադրբեջանական արտադրության Istigal IST-14.5 դիպուկահար հրացանն ունի մոտ 3000 մետր արդյունավետ կրակի հեռահարություն։ Տղերք, հեռու մնացեք Ադրբեջանի պետական սահմանից…»։
Հաշվի առնելով այն հանգամանքը, որ Հայաստանում ԵՄ դիտորդները պարեկություն են իրականացնում հայ-ադրբեջանական սահմանին, Լուազոն այս հաղորդագրությունը գնահատել է որպես ուղղակի սպառնալիք եվրոպացի դիտորդների համար։
«Սա վտանգ է ներկայացնում Եվրախորհրդարանի անդամների համար: Իսկապե՞ս սա ադրբեջանցի «դիվանագետի» խոսքեր են։ Ի՞նչ մակարդակի է իջել ադրբեջանական դիվանագիտությունը: Չհարգելով Արդարադատության միջազգային դատարանի որոշումը և պատանդ վերցնելով 120 հազար մարդու՝ հպարտանալու ոչինչ չկա։ Արդյո՞ք դա է ձեզ ստիպում նյարդայնանլ: Մենք՝ ուժեղ արժեքներ ունեցող եվրոպացիներս, տպավորված չենք։
Մենք կշարունակենք պահպանել խաղաղությունն ու հարգանքը Լեռնային Ղարաբաղի ժողովրդի նկատմամբ»,- գրել է է Նատալի Լուազոն։
