Այսօր Եռաբլուր զինվորական պանթեոնում հողին է հանձնվել ամերիկահայ անվանի բժիշկ, բարերար Վարդգես Նաջարյանի մասունքը: Այս մասին Ֆեյսբուքի իր էջում գրել է ՀՀ առողջապահության նախարար Անահիտ Ավանեսյանը։
«Անուրանալի է մեծ բժշկի ավանդը հայ բժշկագիտության, մասնավորապես` օրթոպեդիայի զարգացման գործում: Նա միշտ Հայաստանի ու հայ ժողովրդի կողքին է եղել: Անձամբ է կազմակերպել Սպիտակի երկրաշարժից տուժած երեխաների բուժումն ու պրոթեզավորումն ԱՄՆ-ում: Արցախյան պատերազմի ժամանակ բուժօգնություն է ցուցաբերել հենց մարտադաշտում ու խրամատներում:
Անվանի բժիշկը հիմնել և կահավորել է Ստեփանակերտի հոսպիտալի վերակենդանացման բաժանմունքը, ինչպես նաև ՊՆ կենտրոնական զինվորական կլինիկական հոսպիտալում հիմնադրել է վնասվածքաբանության և օրթոպեդիայի մասնագիտացված վիրաբուժական բաժանմունքը:
Նա տիկնոջ` բժշկուհի Մերի Նաջարյանի հետ Երևանում ստեղծել է առաջին «արթրոսկոպիկ վիրաբուժության համակարգը»: Զորակցությունս եմ հայտնում բժիշկ Նաջարյանի ընտանիքին, հարազատներին ու գործընկերներին»:
