Հայաստանում առաջին անգամ սպորտային վիրաբուժության գիտաժողով է անցկացվել:
Միջոցառումը կազմակերպել է «Սուրբ Գրիգոր Լուսավորիչ» բժշկական կենտրոնը՝ արթրոսկոպիայի ծառայության և «SmithNephew» ընկերության հետ համատեղ։
Մասնակցել են 100-ից ավելի մասնագետներ Հայաստանից, Ռուսաստանից, Վրաստանից, Ղազախստանից, Ֆրանսիայից, Հունաստանից և այլ երկրներից:
Քննարկվել են արթրոսկոպիայի զարգացման, նոր հնարավորություններն ու կիրառվող նորագույն տեխնիկաները, ներկայացվել են զեկույցներ: «Մասնագիտական բոլոր քննարկումներն ի շահ մեր քաղաքացիների, մարզիկների առողջության են:
Մարզիկները ներկայացնում են մեր երկիրը, ուստի արժանի են որակյալ բուժօգնության: Հայաստանում սպորտային բժշկության զարգացման վրա մեծ շեշտադրում կա, և այն ՀՀ կառավարության ուշադրության կենտրոնում է: Դրա վկայությունն է Կառավարության որոշմամբ օլիմպիական մարզիկների համար առողջապահական ծախսերի լրիվ փոխհատուցումը»,- իր խոսքում նշել է առողջապահության նախարարի տեղակալ Արտակ Ջումայանը:
Գիտաժողովի հատուկ հյուրերից ֆրանսիացի հեղինակավոր վնասվածքաբան-օրթոպեդ, սպորտային վիրաբույժ, Դոհայի «Ասպետար» կլինիկայի մարզական վիրաբուժության ուսումնական կենտրոնի ղեկավար, «ISAKOS» տնօրենների խորհրդի անդամ Ֆիլիպ Լանդրոն «Սուրբ Գրիգոր Լուսավորիչ» բժշկական կենտրոնում մասնակցել է նաև բացառիկ վիրահատության։
Առաջին անգամ Հայաստանում կատարվել է սովորութային հոդախախտի շտկում: Վիրահատությունն ուղիղ հեռարձակվել է գիտաժողովի մասնակիցների համար։ Նրանք հնարավորություն են ունեցել հենց վիրահատարանում աշխատող բժիշկներին հարցեր ուղղել նոր տեխնոլոգիայի մասին։
