Արցախի նախագահ Արայիկ Հարությունյանը պատգամավորների հարցերին պատասխանելիս հայտարարել է, թե իր վրա կարող է մի ճնշում լինել՝ ժողովրդի ճնշումը։
«Ուրիշ ճնշում չկա և չի էլ կարող լինել՝ ո՛չ գերտերությունների, ո՛չ Հայաստանի իշխանությունների, ո՛չ քաղաքական խմբերի, ո՛չ քաղաքական անձանց, ո՛չ որևէ մեկի կողմից»,-ասել է նա։
Միաժամանակ Հարությունյանը նշել է․ «Ճնշում կարող է լինել մի դեպքում, եթե լինի ժողովրդի կողմից ճնշում։ Պետք է աշխատենք, որ հասարակությունը հասկանա, որ եթե 10 օր հետո շաքարավազ չլինի, շուկայի աշխատող կանայք չգան ասեն՝ բա էս վերջը ի՞նչ է լինելու։ Ժողովո՛ւրդ, մենք պետք է որոշում կայացնենք․ մեզ համար գլխավոր նպատակը շաքարավազ ունենա՞լն է, «Կոկա կոլա» խմե՞լն է, գարեջուր ունենա՞լն է, թե՞ իրականում մեր նպատակին հասնելը։
Եթե մեր նպատակին հասնելն է, այո՛, պետք է կրենք զրկանքներ։ Ադրբեջանն ամեն ինչ անելու է, որպեսզի հասարակությանը պառակտի։ Վերջը լավ է լինելու, համոզված եղեք»։
