Հայաստանյան ներքաղաքական կյանքում իրադարձությունները վերջին օրերին գլխապտույտ արագությամբ են զարգանում: Վարչապետի երեկվա ֆեյսբուքյան գրառումը մեծ աժիոտաժ է առաջացրել հանրության շրջանում: Փաստորեն, իշխանությունները վերջապես ընկալեցին հանրության կողմից եկող իմպուլսները և տրամադրությունները: Այո, վաղուց ժամանակն է, որ պատժվեն բոլոր հանցագործները, թալանչիները և կոռուպցիոներները:
Վերոգրյալը, օրինազանցներին պատժելուց բացի, ունի նաև շատ կարևոր մեկ այլ նշանակություն: Հայաստանյան հանրությունը տարիներ շարունակ կարևոր պահանջ է ունեցել և ներկայումս էլ ունի: Դա արդարության հաստատման պահանջն է: Եվ եթե արդարությունը չի հաստատվում, ապա հանրության ընկալումներում մի բան կիսատ է մնում, հանրությունը իրեն բավարարված չի զգում: Դա ուղղակիորեն ենթադրելու է այն, որ կոնֆլիկտային այս իրավիճակը անընդհատ շարունակվելու է, որևէ լավ տեղ չի տանելու և չի բերելու հասարակական կայունության: Ասվածը իհարկե չի նշանակում, որ առանց դատ և դատաստանի բանտերը պետք է լեփ լեցուն լինեն: Բայց այն նախկին հանցավոր համակարգի հիմնական դերակատարները, որոնք, տարիներ շարունակ տիրելով կոռուպցիոն լծակներին, ուղղակիորեն ավերել են երկիրը, անտարակույս պետք է պատժվեն: Իսկ նրանց թիվը քիչ չէ: Եվ դա պետք է կատարվի օրենքի տառի խստագույն պահպանմամբ, որովհետև այս գործընթացը երկու կողմ ունեցող նիզակ է, և եթե անգամ ամենաչնչին իրավախախտումը լինի այս համատեքստում, ապա նախկին ռևանշիստական ուժերի ներկայացուցիչների ձեռքում ուղղակիորեն խաղաքարտեր կհայտնվեն:
Եվս մեկ կարևոր հանգամանք Վարչապետի երեկվա գրառման շրջանակում: Խոսք գնաց նաև լրտեսների մասին: Սրանով կարելի է փաստել, որ իշխանությունները ընդունում են, որ հատկապես վերջին ամիսներին Հայաստանի ներքաղաքական կյանքում ակտիվացել են օտար պետությանը ծառայող 5-րդ շարասյան ներկայացուցիչներ: Սա շատ կարևոր փաստի արձանագրում է, որը միանշանակ ողջունելի է: Իսկ թե որ երկիրն էր ուղղակիորեն բացահայտ կամ Հայաստանում գործող իր գործակալական ցանցի միջոցով տեղեկատվական, քարոզչական և քաղաքական գրոհներ ձեռնարկում մեր պետականության հանդեպ, բոլորին է հայտնի: Վերոգրյալը հատկապես դրսևորվում է Քոչարյանի գործով դատավարության շրջանակներում: Իշխանությունները ֆիքսեցին փաստը, որ կան լրտեսներ՝ նույնն է թե օտար պետության շահերը սպասարկողներ, և ուրեմն, տրամաբանական շղթայից ելնելով, հայտարարությանը պետք է հետևեն կոնկրետ գործողություններ նաև այդ կոնտեքստում:
