Երեկ «Լուրեր»-ի եթերում՝ ԱՄՆ-ը հաստատակամ է ԼՂ-ում ապրողների իրավունքների և անվտանգության ապահովման հարցում թեմայով Պետրոս Ղազարյանի հետ հարցազրույցի ժամանակ ՀՀ-ում ԱՄՆ արտակարգ և լիազոր դեսպան Քրիստինա Քվինը անդրադարձել է Ադրբեջանի կողմից Հայաստանից միջանցք պահանջելու հարցին։
Նկատառմանը, որ Ադրբեջանը սպառնում է ՀՀ-ից ուժով վերցնել միջանցքը, դեսպանն ասել է.
«Սպառնացող հռետորաբանությունը օգտակար չէ և չի օգնում քննարկումներին, խաղաղության գործընթացին առաջ շարժվելու համար։ Ինչ ենք արել մենք․ խրախուսել ենք կողմերին, որ քննարկեն, թե տրանսպորտային համակարգն ինչպես բարելավեն։ Երկու կողմերը իրենք են դա քննարկում միմյանց հետ։ Դրան օգնելու համար ԱՄՆ Միջազգային զարգացման գործակալությունը տրանսպորտային ոլորտի ուսումնասիրություններ է կատարել Հայաստանի համար, որում ներկայացված են տարբեր ուղիներ, երթուղիների տարբերակներ ոչ միայն Ադրբեջանի հետ կապված, այլ ընդհանրապես»:Խոսելով Հայաստանի սուվերենության մասին՝ դեսպանը արձագանքել է, որ հարցերը դեռ քննարկվում են, և որ ոչ մի բան վերջնական կայացված չէ։
«Ես կարծում եմ, որ այդ հարցերը քննարկվում են, չեմ կարծում, որ որևէ բան վերջնական կայացված է։ Ի վերջո կողմերը իրենք պետք է որոշեն դա անելու մեխանիզմները։ Հավելեմ, ես կարծում եմ, որ տարածաշրջանում ավելի լավ տրանսպորտային ուղիներ ունենալը միայն դրական ազդեցություն կունենա Հայաստան պարագայում, կօգնի հայկական ապրանքները հասցնել այլ վայրեր, ապրանքներ բերվեն այլ վայրերից, ինչի շնորհիվ Հայաստանը քիչ կախված կլինի մեկ-երկու արտադրողից կամ շուկայից»,- ընդգծել է նա:
