ԱԺ «Հայաստան» խմբակցության պատգամավորներն այսօր մասնակցել են «Հայաքվե»-ի ստորագրահավաքին։
Լրագրողների հետ ճեպազրույցում խմբակցության ղեկավար Սեյրան Օհանյանը հայտարարել է. «Քաղաքացիական և օրենսդրական այս նախաձեռնությունը անչափ կարևոր է, քանի որ այստեղ նշված են այն բոլոր կարևոր կարմիր գծերը, որոնք մեր խմբակցության և ընդդիմության կարմիր գծերն են։ Կարելի է ընդգծել, որ յուրաքանչյուր գիտակից հայի համար սա շատ կարևոր է՝ Արցախը որևէ պետության կազմում չտեսնել և դրա համար պատասխանատվություն կրել։ Այսօր մենք այնպիսի ճակատագրական պահ ենք ապրում, որ անչափ կարևոր է, որ ՀՀ յուրաքանչյուր քաղաքացի իր կամքն ու քաղաքացիական կողմնորոշումը ցույց տա»։
Նա միաժամանակ կոչ է արել ընկերներին միանալ այդ նախաձեռնությանը. «Այն քաղաքական բնույթ չի կրում, այն քաղաքացիական նախաձեռնություն է և յուրաքանչյուր քաղաքացի պարտավոր է գալ, միանալ, որպեսզի թույլ չտանք ուրանալ մեր պատմությունը, ինչպես նաև տեր կանգնենք Արցախի ճակատագրին»։
Լրագրողի հարցին՝ արդյո՞ք իշխանությունը հավանություն կտա այս նախաձեռնությանը, «Հայաստան» խմբակցության ղեկավարն ասել է. «Եթե իշխանության քայլերին մենք նայենք, ապա բնական է, որ իրենք փորձելու են ինչ-որ արգելքներ դնել սրա համար։ Այս 2.5 տարա ընթացքում Արցախին վերաբերող ընդդիմության բոլոր նախաձեռնությունները իրենք մերժել են։ Եվ հիմա էլ մենք համացանցում տեսնում ենք, որ իրենք իրենց կողմնակիցներին համապատասխան ցուցումներ են տալիս, որպեսզի ստորագրահավաքին չմիանան»։