ԱԺ առողջապահության հարցերի մշտական հանձնաժողովի նախագահ Նարեկ Զեյնալյանը խորհրդարանի արտահերթ նիստում ներկայացրել է օրենսդրական նախագիծ, համաձայն որի, առողջապահության նախարարությունն այսուհետ ցանկացած ներկրված դեղորայքի համար կտա այնպիսի փաստաթուղթ, որի արդյունքում ՊԵԿ-ը կարող է տրամադրել դրոշմապիտակ, և դեղատները վարչական պատասխանատվության չեն ենթարկվի՝ վաճառելով չգրանցված դեղորայք: Նրա խոսքով, նախագծի նպատակը ՀՀ-ում դեղերի շուկան բարելավելն է:
Ըստ Զեյնալյանի՝ փոփոխության անհրաժեշտությունը ծագել է, երբ տեսչական մարմինը դեղատներում հայտնաբերել է դրոշմապիտակավորված, բայց ՀՀ-ում չգրանցված, ըստ այդմ՝ անօրինական ներկրված դեղորայք:
Նախագծով նախատեսվում է նախ ինտեգրել ԱՆ-ի և ՊԵԿ-ի համապատասխան համակարգերը, որպեսզի ՊԵԿ-ը կարողանա ստուգել ներկրման հավաստագրի առկայությունը, և հավաստիանալ, որ նախարարությունն իսկապես թույլատրել է այդ ապրանքը ներկրել Հայաստան, որից հետո նոր կտրամադրվեն համապատասխան դրոշմապիտակները:
Ելույթով հանդես է եկել նաև առողջապահության նախարար Անահիտ Ավանեսյանը, որ հայտարարել է, թե նախագծով դեղերի կարգավորման էֆեկտիվություն է բարձրացվում.
«Այն պարագայում, երբ դեղը ներմուծվում է ոչ թե ԵԱՏՄ երկրներից, այլ ընդհանուր մաքսային տարածքի շրջանակներից, որոշ տնտեսվարողներ ունեին հնարավորություն՝ առանց հավաստագիր ստանալու, ՊԵԿ-ին դիմելով, ստանալ դրոշմապիտակներ և դրանք փակցնել դեղի վրա:
Այսուհետ նրանք պետք է ոչ միայն նշեն տրված հավաստագրի համարը՝ ՊԵԿ-ից ստանալու համար դրոշմապիտակներ, այլև կստեղծվի ուղիղ կապ՝ ՊԵԿ-ԱՆ, որպեսզի հավաստի լինի նաև ստանալու փաստը, հավաստագրված լինելու փաստը»,- շեշտել է նախարարը:
