220-օրյա շրջափակումը իր խիստ բացասական ազդեցությունն է թողել Ստեփանակերտի Մոր և մանկան առողջության պահպանման կենտրոնի գործունեության վրա։ «Արցախպրես»-ի հաղորդմամբ՝ այս մասին ասել է Ստեփանակերտի Մոր և մանկան առողջության պահպանման կենտրոնի գործադիր տնօրեն Վարդգես Օսիպովը։
«Մենք արդեն բախվում ենք դեղորայքի խնդրին, մանավանդ՝ վերջին երկու շաբաթվա ընթացքում, որովհետև մինչ այդ Կարմիր խաչի միջազգային կոմիտեի միջնորդությամբ ստանում էինք որոշակի քանակությամբ դեղորայք, բայց ոչ պահանջվսծ ամբողջ քանակով։ Եղած դեղորայքով կարողացել ենք վերջին շրջանում հաղթահարել իրավիճակը, բայց մեր պահուստը անսահմանափակ չէ։
Եվ, ցավոք սրտի, վերջին շրջանում հայտնվում ենք ծանր իրավիճակում՝ կապված անհրաժեշտ դեղորայքի, շուտ սպառվող ապրանքատեսակների հետ, որպեսզի կարողանանք նորմալ կազմակերպել բուժառուների բուժման ընթացքը»,-իրավիճակը ներկայացրել է Վ. Օսիպովը։
Նա նշել է, որ ստեղծված իրավիճակում փորձում են ամեն ինչ անել ու ապահովել բուժհաստատության` կենսական նշանակություն ունեցող գործունեությունը։
