«Մեր պատվիրակության ղեկավարը ընդունել է նախաձեռնող խմբի անդամներին և երկարատև զրույցի ընթացքում մենք հասցեագրել ենք խնդիրները, որոնք հնչեցվել են երիտասարդների կողմից։ Մենք կարողացել ենք բավականին սպառիչ կերպով ներկայացնել մեր կազմակերպության գործելաոճը, ինչպես է աշխատում այս իրավիճակում կազմակերպությունը, նաև այլ մանրուքներ, որոնք կարող են ոչ պատշաճ կերպով հասկացվել և թյուրըմբռնման առիթ հանդիսանալ այն դեպքում, երբ մեր կազմակերպությունը հասցեագրում է այն խնդիրները, որոնք տեսնում է»,- այս մասին այսօր լրագրողների հետ զրույցում ասաց Կարմիր խաչի հայաստանյան գրասենյակի մամուլի պատասխանատու Զառա Ամատունին։

Ամատունին շեշտեց, որ փորձում են կողմերի հետ գտնել հնարավոր լուծումներ, որոնք կկարողանան ապահովել աշխատանքի հետագա ընթացքը, որը այս պահի դրությամբ կասեցված է։

«Ցանկացած խնդիրներ, որոնք մենք հասցեագրում ենք և որոնք վերաբերում են մարդկանց, նաև մեր աշխատակազմին, ինչպես գիտեք, մենք ունենք գրասենյակ նաև ԼՂ-ում, բնականաբար մեզ համար շատ կարևոր է, որ առաջին հերթին լսելի դարձնենք մեր դիրքորոշումները և կարողանանք լուծումներ գտնել հենց անմիջապես այն իշխանությունների հետ, որոնք պատասխանատու են այս ամբողջ իրավիճակում մարդասիրական տեղաշարժի և մարդասիրական գործունեության համար»,-ասաց Ամատունին։

Զառա Ամատունին նշեց, որ Լաչինի միջանցքով այսօր ընդհանրապես տեղաշարժ չկա, իրենց գործունեությունը կասեցված է։