«Արդար Հայաստան» կուսակցության քաղաքապետի թեկնածու Նորայր Նորիկյանը, մեկնարկած քարոզարշավի ժամանակ լրագրողների հետ ճեպազրույցում չբացառեց, որ Երեւանի ավագանու ընտրություններից հետո, եթե իր գլխավորած կուսակցությունը բավարար քվե ստանա, կոալիցիա կազմի այլ կուսակցության հետ։
Այլ ուժերի հետ կոալիցիա կազմելն էլ, ինչպես ասաց Նորիկյանը, կախված է հետընտրական զարգացումներից։ Եթե տվյալ քաղաքական ուժի արժեքային համակարգը, գաղափարները համահունչ լինեն «Արդար Հայաստան» կուսակցության արժեքների եւ գաղափարների հետ, Նորիկյանը չբացառեց, որ կոալիցիա կկազմի։
«Նաեւ չեմ բացառում, որ Երեւանում հնարավոր կլինի կոալիցիոն կառավարում ապահովել»։
Ինչո՞ւ չհաջողվեց ընդդիմադիր դաշտում համաձայնության գալ եւ մեկ թեկնածուով մասնակցել այս ընտրություններին, քանի որ այդ մասին ի սկզբանե խոսվում էր, թե այդպես հնարավոր կլինի իշխող ուժին հաղթել։
Ի պատասխան այս հարցին՝ Նորիկյանն ասաց, թե ինչպիսին է եղել քաղաքական ուժերի դրսեւորումները կոնսոլիդացիայի շուրջ՝ «կգա ժամանակը՝ անուններով, փաստերով կասեմ»՝ հայտարարեց նա:
«15-16 քաղաքական ուժի եւ առանձին անհատների հետ անձամբ եմ հանդիպել, փորձել եմ նախաձեռնել մի քանի քաղաքական ուժերի եւ անհատների հետ հանդիպում։ Չի ստացվել՝ տարբեր պատճառներով։ Հանգեցինք հետեւյալին, որ մեր քաղաքական դաշտում սեփական եսից կամ ուժերից դուրս այլ իրողություն չեն տեսնում»,- պատմեց Նորիկյանը։
