«Դուք խոսում եք մարտի 1-ի մասին, և երևի հույս եք դրել, որ երիտասարդները, որ այդ օրերին չեն ապրել, պետք է լսեն ու հավատան ձեզ։ Կամ չեմ բացառում, որ դուք, այն ժամանակ լինելով երիտասարդ ու ձեր հոր որդին, իրականությունը լավ չեք տեսել»,- ասել է ԱԺ նախագահ Ռուբեն Ռուբինյանը՝ արձագանքելով Ռոբերտ Քոչարյանի որդու՝ «Հայաստան» խմբակցության պատգամավոր Լևոն Քոչարյանի՝ «մարտի 1-ի» մասին ելույթին։
«2008 թ. մարտի 1-ի առավոտյան ժամը 6-ին Ազատության հրապարակում եղել է մաքսիմում 100-200 մարդ, և մեծ մասը՝ քնած։ Ժամը 6-ին ոչ մի բան չեն արել. միակ բանը, որ արել են՝ քնելն է եղել կամ խռռացնելը, և հատուկ ջոկատայինները եկել, սկսել են բոլորին մահակներով ծեծել։ Մարդիկ փախել են, հետևներից վազելով, ծեծելով, լարել են մարդկանց։ Հիմա խնդրում եմ ասել՝ էդ մարդիկ ի՞նչ էին արել, ինչո՞ւ էին հատուկ ջոկատայինները առավոտյան 6-ին եկել, այդ մարդկանց դուբինկաներով զխկել»։
Նա կոչ է արել մարտի 1-ին եղածը համեմատել վերջին տարիներին եղածի հետ։
Ռուբինյանը նաև հիշեցրել է մարտի 1-ի գործով ՄԻԵԴ որոշումը՝ շեշտելով. «Ֆիքսվել է, որ այդ 10 մահերի պատճառը եղել է պետությունը, որը ղեկավարում էր ձեր հայրը՝ Ռոբերտ Քոչարյանը։ Դա ապացուցված է»։
Ռուբինյանը հիշեցրել է, որ 1998-ին, երբ Ռոբերտ Քոչարյանը ստանձնել էր ՀՀ նախագահի պաշտոնը, Հայաստանի ու Ադրբեջանի ռազմական բյուջեները եղել են հավասար, բայց նրա նախագահության վերջում տարբերությունը մեծ է եղել. «Իմ և ձեր ընտանիքների բյուջեների հարաբերակցությունն ասեմ՝ ձեր ընտանիքն ունի 200 մլն դոլար, մերը՝ ոչ մի։ Այ դա իրոք հպարտանալու թիվ է, կարող եք հպարտանալ»,- ասել է նա։
