Այսօր՝ օգոստոսի 30-ին, մի խումբ քաղաքացիներ Ստեփանակերտի Վերածննդի հրապարակից ողջույնի ու շնորհակալության խոսք են հղել Ֆրանսիային՝ Արցախ բերվող հումանիտար օգնության համար։
«Արցախպրես»-ի հետ զրույցում նախաձեռնության հեղինակ Արմինե Հայրապետյանն ասել է, որ այս ծանր ու վճռորոշ պահին արցախցիների համար անչափ կարևոր է Ֆրանսիայի աջակցությունը։
«Փաստորեն, այսօր գործնական քայլ կատարվեց, և Փարիզի քաղաքապետը հասավ մինչև Կոռնիձոր։ Ճանաչելով մեր թշնամուն՝ սպասելի էր, որ Անն Իդալգոն չէր կարողանալու հատել անցակետը։ Բայց, ամեն դեպքում, հույս ունենք, որ սա նոր քաղաքական քայլերի սկիզբ կդառնա։
Դրա համար պարզապես ուզում ենք շնորհակալություն ասել Ֆրանսիային, Փարիզի քաղաքապետին, պատվիրակության բոլոր անդամներին, ովքեր արդեն իրենց հստակ քաղաքական գնահատականը տվել են Արցախի տոտալ շրջափակմանը։ Փարիզի քաղաքապետը նշել է, որ սա էթնիկ զտում է, որ Արցախի ժողովուրդը հիմա բանտում է, պատվիրակության անդամները Ալիևին ագրեսոր են կոչել»,-նշել է Ա. Հայրապետյանը։
Ստեփանակերտի փոխքաղաքապետ Սուրեն Թամրազյանը քաղաքապետարանի անունից շնորհակալություն է հայտնել Ֆրանսիայի` Ստեփանակերտի քույր քաղաքներին։
«Փարիզի քաղաքապետ Անն Իդալգոյի ղեկավարած պատվիրակության նախաձեռնության համար անչափ շնորհակալ ենք` այս ծանր օրերին Արցախի ժողովրդի կողքին կանգնած լինելու համար։ Իրոք, պետք է նշել, որ ամբողջ աշխարհում Ֆրանսիան այն երկիրն է, որը ոչ թե վախենում, այլ նախաձեռնում է նմանատիպ քայլեր։ Համոզված եմ` մեր բարեկամական ու համագործակցային կապը երբևէ չի ընդհատվի»,-նշել է Ս. Թամրազյանը։
Ակցիան շարունակվել է Ազատամարտիկների պուրակում տեղադրված Արցախի և Ֆրանսիայի բնակավայրերի միջև բարեկամության ցուցանակի մոտ՝ ֆրանսերենով շնորհակալական խոսքեր հղելով բարեկամ երկրին։
