Կներդրվի լիազորված տնտեսական օպերատորի ինստիտուտ

Հայաստանում կներդրվի լիազորված տնտեսական օպերատորի ինստիտուտ։

Պետ․ եկամուտների կոմիտեի նախագահ Ռուստամ Բադասյանը կառավարության նիստում նշեց, թե լիազորված տնտեսական օպերատորը հատուկ կարգավիճակ է, որը մաքսային մարմնի կողմից տրվում է տնտեսվարող սուբյեկտին, եթե այդ սուբյեկտը նվազ ռիսկայնություն է ներկայացնում մաքսային իրավախախտումների տեսանկյունից։

«Այդ կարգավիճակը տնտեսվարողին հնարավորություն է տալիս օգտվել մի շարք մաքսային պարզեցված ընթացակարգերից: Փուլ առ փուլ տնտեսվարող սուբյեկտը դառնում է ինքն իր մաքսային տեսուչը, և մաքսային մարմնի հետ հարաբերությունները հասցվում են նվազագույնի»,-ասաց Բադասյանը:

Նրա խոսքով՝ այս փուլում այդպիսի տնտեսվարողներին հնարավորություն են տալիս անհերթ սպասարկվել մաքսակետերում.

«Երկրորդը, իրենք չեն օգտվելու ժամանակավոր պահպանության պահեստներից, այսինքն, սահմանային անցակետերից կարող են միանգամից իրենց ապրանքը տանել ու պահել իրենց պահեստում: Հետագա փուլերում ևս երկու պարզեցված ընթացակարգ ենք պատրաստ ներդնել, որով մաքսային մարմնի հետ կապը իսպառ կբացակայի, և տնտեսվարողն ինքը կարող է պլոմբներ կիրառել ներմուծելիս և արտահանելիս:

Երրորդը, սահմանային կետից բացթողումը կարող է կատարվել հայտարարագիրը հետագայում ներկայացնելու և մաքսային վճարները հետագայում կատարելու պայմանով: Այս մասով թվային լուծումը պատրաստ է, և ՊԵԿ-ը այն շուտով կներդնի»,-ընդգծեց Բադասյանը՝ հավելելով, որ այս պահին Հայաստանում ոչ մի լիազորված տնտեսական օպերատոր չկա:

Վարչապետ Նիկոլ Փաշինյանն էլ ասաց, թե մաքսային ընթացակարգերի չարաշահումը և դրան հարակից առաջացող կոռուպցիոն ռիսկերը համարվել են տնտեսական բնականոն գործունեությանը խոչընդոտող գործոններ. «Մենք փորձել ենք այնպես անել, որ կոռուպցիան արմատախիլ լինի մաքսային համակարգից, բայց դա ոչ ամեն օր է հաջողվել: Դրա վկայությունն է, որ ունենք վերջերս բացահայտված գործեր»: