ԿԳՄՍ նախարար Ժաննա Անդրեասյանը հայտարարել է, թե նախարարությունը բավարար քանակությամբ 10-րդ դասարանի համար դասագրքերի հայտեր չի ստացել։ Նրա խոսքով, Հայաստանում 10-րդ դասարանի նոր դասագրքերի ներդրումը կհետաձգվի 2024 թ.։
«Մյուս դասարաններում, կարելի է ասել, ճնշող մեծամասնությամբ դասագրքերն ունենք։ Դրանք արդեն էլեկտրոնային տարբերակով հասանելի են։ Դրանց մի մասը այս սեպտեմբերի 1-ին արդեն կլինեն դպրոցներում, մյուս մասը` սեպտեմբերի ընթացքում։
Հիշեցնեմ, որ խոսքը` 2-րդ, 5-րդ, 7-րդ դասարանների դասագրքերի մասին է, մյուս դասարանների դասագքրերը դեռևս չեն փոխվում»,- ասել է Անդրեասյանը կառավարության այսօրվա նիստում։
Նախարարի խոսքով` արդյունքում ՀՀ դպրոցներում աշխատանքի կազմակերպման որոշակի խնդիր կլինի, սակայն նախորդ օրերին շատ ինտենսիվ աշխատել են դպրոցների հետ ու ընթացքում էլ ինտենսիվ կապի մեջ կլինեն ուսուցիչների հետ։
Նշենք, որ ՀՀ ԿԳՄՍՆ նոր չափորոշիչը ներդրվել է 2-րդ, 5-րդ, 7-րդ, 10-րդ դասարանների առարկայական ծրագրերում, որոնք փորձարկվել են Տավուշի մարզում ու ստացված արդյունքներից նախարարությունը գոհ է, այդ պատճառով 2023. սեպտեմբերից դրանք ներդվրում են հանրապետության բոլոր դպրոցներում։
