Գերմանիայի արտաքին գործերի նախարար Անալենա Բերբոքի և Ադրբեջանի արտգործնախարար Ջեյհուն Բայրամովի միջև այսօր հեռախոսազրույց է կայացել։
Զրույցի ընթացքում քննարկվել է տարածաշրջանում ընթացիկ իրավիճակը, ինչպես նաև Ադրբեջանի և Հայաստանի միջև հարաբերությունների կարգավորման գործընթացը։
Բայրամովը իր գործընկերոջը մանրամասն տեղեկացրել է տարածաշրջանում տիրող իրավիճակի մասին՝ նշելով, որ «Հայաստանի կողմից տարածվող լարված հումանիտար իրավիճակի և շրջափակման մասին պնդումներն անհիմն են»։
Նրա խոսքով՝ Աղդամ-Ստեփանակերտ ճանապարհը Լաչինի միջանցքի հետ համաժամանակյա օգտագործելու Ադրբեջանի առաջարկի մերժումը «Հայաստանի և Ղարաբաղի անօրինական վարչակարգի կողմից ապացուցում է, որ հումանիտար ճգնաժամի մասին պնդումները կեղծ են»:
Բայրամովը նշել է, որ «Հայաստանի սադրիչ գործողությունները՝ ներառյալ Ադրբեջանի տարածքներից հայկական զինված ուժերը դուրս չբերելը, խոչընդոտում են խաղաղության հաստատման ջանքերին և սպառնալիքների աղբյուր են»։
Զրույցի ընթացքում տեղի է ունեցել մտքերի փոխանակում փոխադարձ հետաքրքրություն ներկայացնող այլ հարցերի շուրջ ևս:
