Աղդամի ճանապարհով ՌԴ օգնությունը Արցախին միջանկյալ լուծում է, ինչո՞ւ․ Հայրապետյան

Ադրբեջանական լրատվամիջոցների փոխանցմամբ, ռուսական Կարմիր Խաչը ուտելիքներով ու առաջին անհրաժեշտության ապրանքներով բարձվել է ՌԴ –ի տարածքում ու հիմա Ադրբեջանի տարածքով շարժվում է դեպի Աղդամ:

Կարելի է ենթադրել, որ Աղդամից թույլ են տալու ռուսական ապրանքները մտնեն Արցախ: Դրանից հետո Ադրբեջանը հավանաբար խոստացել է բացել Լաչինի միջանցքը:

Այս մասին գրում է ադրբեջանագետ Տաթևիկ Հայրապետյանը։

«Իմ տպավորությամբ, սա միջանկյալ լուծում է, վստահորեն առաջարկվել է ռուսական կողմից ու ընդունվել Ադրբեջանի ու Արցախի կողմից:

Փաստացի, Արցախը չի ընդունում ադրբեջանական ապրանք, ներս չի թողնում իրենց Կարմիր Մահիկի կազմակերպությանը, բայց արգելապատնեշները քաշում են ռուսական Կարմիր Խաչի ու ՌԴ ապրանքների համար:

Ադրբեջանը դա համարում է ձեռքբերում, Արցախն էլ ցույց է տալիս, որ հավատարիմ մնաց իր դիրքորոշմանը՝ չընդունել ադրբեջանական ապրանք:Հուսամ՝ հետո իսկապես կբացվի Լաչինի միջանցքը:

Այդուհանդերձ, դառը փորձը ցույց է տալիս, որ «սատանան դետալների» մեջ է: Մնում է հույս ունենալ, որ ամեն կետ պայմանավորվել են հստակ ու Ադրբեջանը վերջում հետ չի կանգնի իր խոստումներից»: