«Արայիկ Հարությունյանը հրաժարական տվեց, երբ հայտնի դարձավ Պուտին-Էրդողան բանակցությունների օրը, որից հետո հայ-ադրբեջանական սահմանին եւ Արցախի շուրջ իրավիճակը կտրուկ սրվեց»,-այս մասին գրել է քաղաքագետ Վահրամ Աթանեսյանը։
«Սեպտեմբերի 6-ին Եվրամիության Նախարարների կոմիտեն քննարկեց Լեռնային Ղարաբաղում իրավիճակը եւ հանդես եկավ Լաչինի միջանցքը անհապաղ բացելու կոչով:
Օրերս հայտնի դարձավ, որ նույն հարցով դեռեւս սեպտեմբերի 1-ին,-ուշադրություն՝ դա Արայիկ Հարությունյանի պաշտոնական հրաժարականի օրն է,- Իլհամ Ալիեւի հետ հեռախոսազրույց է ունեցել ԱՄՆ պետքարտուղար Բլինքենը: Դրան հաջորդեց ՌԴ ԱԳՆ հատուկ բանագնաց Խովաեւի՝ մեկ շաբաթվա ընացքում Իլհամ Ալիեւի հետ երկրորդ հանդիպումը:
Նույն օրը Ստեփանակերտի ,,քաղաքական կոնսիլիումը,, որոշեց նախագահի միասնական թեկնածու առաջադրել Սամվել Շահրամանյանին եւ ոչ մի ձեւով թույլ չտալ, որ Սամվել Բաբայանը նախագահի թեկնածու առաջադրվի:
Այս գործընթացները տեղի ունեցան ԱՄՆ Սենատի արտաքին հարաբերությունների կոմիտեում ,,Լեռնային Ղարաբաղի ճգնաժամը,, հարցով լսումների մասին պաշտոնական տեղեկատվության համապատկերին:
Այսօր Արցախի Ազգային ժողովը Սամվել Շահրամանյանին ընտրեց նախագահ: Եթե վաղը կամ մյուս օրը միաժամանակ բացվի Լաչինի եւ Աղդամի ճանապարհը, ապա ԱՄՆ Սենատում լսումներ, ամենայն հավանականությամբ, չեն կայանա: Ի՞նչ իմաստ ունի միջամտել մի իրավիճակի, երբ ներգրավված կողմերի միջեւ ամենասկզբունքային հարցում համաձայնություն արդեն ձեռք է բերվել:
Կործանվողների փրկությունն իրենց գործն է: Ամենեւին էլ պատահական զուգադիպություն չէ, որ Հայաստանի վարչապետը Ֆրանսիայի նախագահի եւ Գերմանիայի կանցլերի հետ հեռախոսազրույցներ է ունենում Արցախում նոր նախագահի ընտրության օրով»,- գրել է նա:
