Երրորդ կարգի հաշմանդամները ևս կարող են օգտվել 100% դեղապահովման ծրագրից

Առողջապահության նախարար Անահիտ Ավանեսյանն անդրադարձել է դեղապահովման ծրագրին։

Նրա խոսքով՝ այդ ծրագիրը բոլոր քրոնիկ հիվանդների և հաշմանդամների համար դառնում է միասնական ծրագիր։«Աղճատումները, երբ առաջին և երկրորդ կարգի հաշմանդամներին պետությունը փոխհատուցում էր 100%–ով, իսկ երրրորդ կարգի համար՝ 50 կամ 30%–ով, այդ տարբերությունները վերանում են։

Ֆունկցիոնալության գնահատման համակարգին միացածները և դեռ հաշմանդամության կարգի շրջանակներում երաշխիքներ ունեցող անձինք կօգտվեն դեղապահովման ծրագրից»,- ասել է նա։

Ըստ Ավանեսյանի՝ ծրագիրը ֆինանսավորված է։

Նա նշեց, որ օրենքը շուտով կմտնի ուժի մեջ, և քաղաքացիները կարող են դիմել նոր կարգով 100% փոխհատուցմամբ դեղեր ստանալու համար. «Երրորդ կարգի հաշմանդամները ևս կարող են օգտվել 100% դեղապահովման ծրագրից»,- շեշտեց նա։