ՀՀ-ն կրկին պայքարում է երկու ճակատով. Կոնջորյան

ՀՀ ԱԺ «Քաղաքացիական պայմանագիր» խմբակցության ղեկավար Հայկ Կոնջորյանը ՀՀ ինքնիշխան տարածքի դեմ Ադրբեջանի սանձազերծած ռազմական ագրեսիայի առաջին տարելիցի կապակցությամբ հետևյալ գրառումն է արել.

«Ուղիղ 1 տարի առաջ` այս օրը, Ադրբեջանը ռազմական ագրեսիա սանձազերծեց Հայաստանի ինքնիշխան տարածքի դեմ:

Այդ օրերին Հայաստանի մի շարք համայնքներում նախընտրական քարոզարշավ էր: Ադրբեջանական հարձակումից անմիջապես հետո, հայաստանյան հայտնի շրջանակները, առանց մեկ վայրկյան հապաղելու, ձեռնարկեցին ներքաղաքական լարվածության և ՀՀ ինքնիշխանության դեմ ուղղված հերթական դավադիր հարձակումները: Հայաստանը պայքարում էր երկու ճակատով:

Այս օրերին, Ադրբեջանը ՀՀ սահմանների երկայնքով կրկին կենտրոնացնում է մեծ ծավալի ռազմական տեխնիկա` շարունակելով իր ագրեսիվ հռետորաբանությունը:

Այս օրերին Երևանում կրկին նախընտրական քարոզարշավ է: Այս օրերին, ներհայաստանյան մի շարք ուժեր, կրկին հարձակում են գործում ՀՀ ինքնիշխանության դեմ` սպառնալով Երևանը վերցնել` ընդհուպ արյամբ:

Հայաստանը կրկին պայքարում է երկու ճակատով:

Արտաքին և ներքին այս սպառնալիքների նպատակը` կաթվածահար անել Հայաստանի պետական կյանքը, ներքին կայունությունը, ինքնիշխանությունը և ժողովրդավարությունը:

Իսկ ո՞րը պետք է լինի մեր արձագանքը այս իրավիճակին, սիրելի´ հայրենակիցներ, սիրելի´ երևանցիներ: Ամեն կերպ ամրապնդե´լ մեր ինքնիշխանությունը և պետականությունը, արձանագրե´լ ժողովրդավարական հաղթանակ Երևանում:

Ամրանալ դրսում և ներսում: Ամրանալ ներսում և դրսում: Սա է ճանապարհը ազատության, ինքնիշխանության, պետականության հաղթանակի»:

Թիվ 1