Սեպտեմբերի 14-ին Եվրոպական խորհրդարանը լիագումար նիստի ընթացքում ճնշող մեծամասնությամբ «Ադրբեջանում ազատազրկված Գուբադ Իբադօղլուի դեպքի» վերաբերյալ հրատապ բանաձև է ընդունել։
Բանաձևի ընդունմանը նախորդել է վերոնշյալ թեմայի շուրջ բանավեճ-քննարկում, որի ժամանակ խորհրդարանում հիմնական քաղաքական ուժեր ներկայացնող 13 պատգամավորներ խոսելով իրենց խմբակցությունների անունից՝ նշել են Ադրբեջանում մարդու իրավունքների լուրջ խախտումներն ու ժողովրդավարական արժեքների ոտնահարումները, կոչ արել ԵՄ բարձր ներկայացուցչին, ԱԳԵԾ-ին և ԵՄ անդամ պետություններին պայմանավորել Ադրբեջանի հետ հետագա հարաբերությունների և գործընկերության զարգացումը բոլոր քաղբանտարկյալների ազատ արձակմամբ, ինչպես նաև կոչ են արել Մարդու իրավունքների գլոբալ պատժամիջոցների ռեժիմի ներքո ԵՄ պատժամիջոցներ սահմանել Ադրբեջանի այն պաշտոնյաների նկատմամբ, որոնք իրագործել են մարդու իրավունքների լրջագույն խախտումներ։
Ավելին, խորհրդարանի անդամները ևս մեկ անգամ ուշադրություն են հրավիրել այն հանգամանքի վրա, որ Լեռնային Ղարաբաղի 120 000 հայ բնակչությունը դեռևս գտնվում է էթնիկ զտման վտանգի առջև և որ Լաչինի միջանցքն արգելափակված է։ Մի քանիսն ընդգծել են, որ միջանցքի վերաբացման վերջին ինքնահռչակ պատրաստակամությունը ոչ այլ ինչ էր, քան տարածաշրջանն ամբողջությամբ կլանելու հերթական փորձ՝ լայնամասշտաբ էթնիկ զտումների վտանգի ներքո։ Այս համատեքստում նշվել է Եվրոպական հանձնաժողովի կողմից Ադրբեջանին «վստահելի գործընկեր» որակելու անընդունելի եզրույթը։
Բանաձևն ընդունվել է 539 կողմ, 6 դեմ և 24 ձեռնպահ ձայներով։ Գուբադ Իբադօղլուն դաժան հարձակման է ենթարկվել և կամայականորեն ձերբակալվել 2023թ․ հուլիսի 23-ին և կասկածելի մեղադրանքներով դեռ մնում է բանտում։ Նա հայտնի է Ադրբեջանի կառավարության խիստ քննադատությամբ։
